Рөстәм Миңнеханов: “Урманчылар династиясен сакларга кирәк”

Урманнар хәзер Россия Федерациясе территориясенең яртысын биләсә, Татарстанның - 17 генә процентын. Урман хуҗалыгы тармагы, чынлыкта, инерцион, бернәрсә дә эшләмәсәң дә берни булмас кебек, ләкин киләчәк буыннар уңышлылыгы өчен кул кушырып утырырга ярамый, чөнки урман эшендә бүгенге тырышлыкның хезмәт җимешләре дистәләрчә еллардан соң гына өлгерә, сизелерлек була. 17 процент кына урманлык булгангамы, аның үзебезнең файдага икәнен яхшы аңлап эш итәбез, чөнки әйләнә-тирә мохитнең, экологиянең яшәеш өчен төп критерийларның берсе булып тора.

Бүген “Корстон” кунакханә-сәүдә-күңел ачу комплексында уздырылган ТР Урман хуҗалыгы министрлыгы коллегиясе утырышындагы чыгышында ТР Президенты Рөстәм Миңнеханов шундый фикер әйтте. Россия кебек урманнарга бай илдә урман хуҗалыгы белән идарә итүдә, Татарстан башлыгы сүзләренчә, федераль агентлык кына түгел, министрлык кирәк. “Бу хакта минем фикерем нык, алга таба да шулай диячәкмен. Чөнки бу җитди тармак, урман исә үзеннән-үзе генә үсми, үзе үскән урман инде ул бөтенләй башка һәм мөнәсәбәт тә башка булачак, - диде ул һәм бүген алып барыла торган урман утырту-тәрбияләп үстерү, селекция-орлыкчылык эше, кадрлар әзерләүнең мөһимлегенә басым ясап. - Боларның барысы да фәнгә нигезләнеп эшләүне һәм күп хезмәт, чыгымнар таләп итә, аның каравы, нәтиҗәсе дә зур була”.

Кадрлар мәсьәләсенә аерым тукталып, Президент, урманнарда эшләүче кешеләргә, гаиләләргә аерым мөнәсәбәт булырга тиеш, чөнки алар кече яшьтән әзерлек уза; урманчылар династиясен сакларга кирәк, урман хуҗалыгында профессионаллар эшләве мөһим, бу өлкәдә белгечләр әзерли торган уку йортларын үстерү зарур, диде. Гомумән, техникумның (Лубян урман хуҗалыгы техникумы турында сүз) дәрәҗәсен һәм ролен күтәрү кирәк. Урманнардан файдалану дөрес оештырылуы шарт; урманлылык тармагында уңышлы эшләп була, Россиядә алга таба аерым программаларны сынап-эшләп карарлык пилот төбәкләр булырга тиеш һәм Татарстан барлык федераль программаларда да катнашачак, дип ышандырды Р.Миңнеханов.

Аның кебек эш күрсәтә һәм үз сүзен федераль дәрәҗәдә әйтә белгән кешеләр безгә бик кирәк, дип, Президент ТР урман хуҗалыгы министры Наил Мәһдиевнең, тармакның эшчәнлегеннән канәгать калуын белдерде. Коллегия утырышында Россия урман хуҗалыгы федераль агентлыгы җитәкчесе Виктор Масляков, федераль органнар вәкилләре булуын күздә тотып, федераль органнардан ярдәмгә өмет багълыйм, дип “киртләп” куйды.

Россия урман хуҗалыгы федераль агентлыгы җитәкчесе Виктор Масляков чыгышында, регионнарның мондый югары дәрәҗәдәге һәм конкрет фикерләр, перспективалар анык күрсәтелгән җитди җыенында беренче катнашуым, дип билгеләп үтте. “Татарстан аякларында нык басып тора, үсеш перспективалары күзалланган. Урман хуҗалыгы тармагы өчен горурлык хисләре кичерәм мин һәм аңа карата бу республикада игътибарлы карашка шатмын. Бөтен проектларда да уңай нәтиҗә күрсәткән Татарстан тәҗрибәсе бөтен Россиягә таратылачак, республикада әзерләнгән урман үстерү материаллары Россиянең үзәк һәм көньяк өлешләрендә дә файдаланылачак”, - дип канәгатьлек белдерде илнең урман хуҗалыгы башлыгы.

Соңыннан Р.Миңнеханов хезмәтендә аерылып торган һәм күп еллар шушы тармакта уңышлы эшләгәннәргә республиканың дәүләт һәм федераль агентлык бүләкләрен тапшырды.