Фурсенко һәм Коновалов Казанда студентлар баскетболы буенча килешүгә кул куйды

Бүген Казанда РФ Мәгариф һәм фән министрлыгы һәм “Студентлар баскетбол ассоциациясе” коммерцияле булмаган оешмасы арасында хезмәттәшлек турындагы килешүгә кул куелды. Документны РФ мәгариф һәм фән министры Андрей Фурсенко һәм “Студентлар баскетбол ассоциациясе” коммерцияле булмаган оешмасы президенты, РФ юстиция министры Александр Коновалов үз имзалары белән беркетте.

Килешү сәламәт яшәү рәвешен пропагандалау, физик культура һәм спортны үстерү өлкәсендә хезмәттәшлек итүне күздә тота.

Килешүне имзалау тантанасында Татарстан Президенты Рөстәм Миңнеханов, РФ спорт, туризм һәм яшьләр сәясәте министры урынбасары – статс-секретарь Наталья Паршикова, Халыкара студентлар спорт федерациясенең (FISU) вице-президенты, Россия студентлар спорт берлеге башлыгы Олег Матыцин, танылган баскетболчылар Сергей Белов, Анатолий Мышкин, Сергей Панов, шулай ук Россия җыелма командасының элеккеге баш тренеры Сергей Елевич һәм башкалар катнашты.

“РФ Мәгариф һәм фән министрлыгы белән һәрвакыт хезмәттәшлектә торсак та, бүген ике арадагы мөнәсәбәтләр яңа этәргеч алды”, - дип ассызыклады килешүгә кул куйганнан соң Александр Коновалов.

Россия Студентлар баскетбол ассоциациясе башлыгының сүзләренә караганда, документны 2013 елда Универсиада узачак Казанда имзалау символик мәгънәгә ия. “Уеннарны үткәргәннән соң Казанның Россиядә студентлар спорты флагманына әверелү, ә аннары Халыкара дәрәҗәгә күтәрелү мөмкинлеге туачак. Без Рөстәм Миңнехановка, аның командасына биредә яшьләргә спорт белән актив рәвештә шөгыльләнү мөмкинлеге тудырганнары өчен өчен бик тә рәхмәтле”, - дип ассызыклады Александр Коновалов.

Үз чиратында, ТР Президенты килешүгә кул куюны Казан өчен әһәмиятле вакыйга дип атады. “2013 елгы Универсиаданы кабул итү хокукы өчен көрәштә җиңү нәтиҗәсендә, студентлар спортына, инфраструктурага мөнәсәбәт бөтенләй үзгәрде. Безнең вузлар шуның белән яши. Спорт идеясе – безне берләштерә торган иң яхшы идея. Мин илебездә мондый әһәмиятле чараларның тагын да күбрәк булуын теләр идем”, - дип белдерде Рөстәм Миңнеханов.

Россия мәгариф һәм фән министры билгеләп үткәнчә, студентка белем алу кызыклы булырга тиеш, ә моның өчен аңа спорт белән шөгыльләнү мөмкинлеге тудырырга кирәк. “Баскетбол – көрәшергә мәҗбүр итә, команда хисе тәрбияли торган яхшы спорт, - дип ассызыклады Андрей Фурсенко. – Бүген без мөһим килешүгә кул куйдык һәм дөрес юнәлеш сайланды. Килешү артында конкрет әйберләр тора”. РФ мәгариф һәм фән министрының сүзләренә караганда, спортта яхшы казанышлар күрсәтүче студентлар стипендияләре артуына өметләнә ала.

Фурсенко билгеләп үткәнчә, ул бүген республиканың ректорлар корпусы белән очрашкан һәм вуз җитәкчеләрен: инициатива күрсәтеп, алга хәрәкәт итүчеләрнең министрлыкның матди ярдәменә исәп тота алачагына ышандырган.