2012 елда Татарстанда компьютер нигезләренә 10 мең пенсионер һәм өлкән яшьтәге гражданны өйрәтәчәкләр

Тиздән Татарстанда өлкән яшьтәге гражданнарны компьютер нигезләренә өйрәтүче “Интернет-долголетие” дигән яңа проект старт алачак. Бу хакта бүген журналистларга ТР Хөкүмәт йортында узган брифингта хәбәр ителде. Очрашуда ТР хезмәт, мәшгульлек һәм социаль яклау министры Айрат Шәфигуллин, мәгариф һәм фән министры урынбасары Андрей Поминов, РФ Пенсия фондының ТР бүлеге идарәчесе урынбасары Асия Вәлиуллина һәм Россия Пенсионерлар берлегенең ТР төбәк бүлеге җитәкчесе Любовь Мишина катнашты.

Брифингта билгеләп үтелгәнчә, пенсия яшендәге гражданнарны компьютер серләренә төшендерү буенча республикада моңарчы да проектлар гамәлгә ашырылды. Мәсәлән, 2009 елдан республикада “Компьтер ликбезы” дигән хәйрия акциясе уздырылды. ТР Мәгариф һәм фән министрлыгы белән Россия Пенсионерлар берлегенең төбәк бүлеге 36 сәгатьлек әлеге курсларда 30 меңнән артык пенсионерны компьютердан гына түгел, интернет челтәре мөмкинләреннән дә файдаланырга өйрәткән.

“Интернет-долголетие” проекты исә тагын да киңрәк категорияне колачлаячак. ТР хезмәт, мәшгульлек һәм социаль яклау министры Айрат Шәфигуллин сүзләренә караганда, проектта пенсиягә чыгу алдында торучылар да, туендыручысын югалту, инвалидлык буенча пенсия алучылар да катнаша ала. Министр аңлатуынча, проектның максаты – әлеге категория гражданнарны җәмгыятьтә социаль адаптацияләүгә булышу, эш көчендә булучыларга эш табарга ярдәм итү, заманча компьютер технологияләрен кулланып, яшьләр кебек үк, аларга өйдән чыкмыйча гына мәгълүмат алу, электрон дәүләт хезмәтләреннән файдалану мөмкинлеге тудыру.

2012 елда әлеге проект нигезендә 10 мең кешене укыту ниятләнә. 72 сәгатькә исәпләнгән семинар 3 ай дәвам итәчәк. Дәресләр атнага икешәр сәгать ике тапкыр үткәреләчәк. Аның барышында өлкәннәр компьютердан куллану серләренә төшенү белән генә чикләнмичә, бөтендөнья челтәре мөмкинлекләрен, электрон почтадан, электрон дәүләт хезмәтләреннән файдаланырга, компьтерда текстлар язарга, һәртөрле презентацияләр ясарга өйрәнеп чыга.

Өлкән яшьтәге гражданнарның үзенчәлеген исәпкә алып, аларның төп өлеше өчен укулар майга кадәр оештырылачак. Калган өлеше ноябрьдән укый башлаячак. Гаризалар 1 февральдән кабул ителә башлый. Бу эштә җаваплылык үзәге итеп мунициапаль берәмлекләрдәге мәшгульлек үзәкләре, социаль яклау бүлекләре, пенсия фонды бүлекләре билгеләнгән. Проекның гамәлгә ашырылуын муниципалитетлар координацияли.

Курсларны тәмамлаучыларның барысы да бу хакта махсус сертификат алып чыгачак. Компьютер белеме турындагы сертификатка ия булу эшләргә сәләтлеләр өчен эш табуда да ярдәмгә килә. Мәсәлән, узган еллар тәҗрибәсе күрсәткәнчә, “Өченче яшь университеты” программасында катнашучыларның 30 проценты эшкә урнашкан.

“Интернет-долголетие” - дәүләтнең коммерцияле булмаган оешмалар белән хезмәттәшлеге үрнәге. Бу хактагы идеяне 2007 елдан бирле компьютер гыйлеменә өйрәтүче “Өченче яшь университеты” проектын уңышлы гамәлгә ашыручы Россия Пенсионерлар берлегенең төбәк бүлеге керткән иде. Инициатива ТР Президенты Рөстәм Миңнехановта хуплау тапты. Дәүләт проектны финанслауда катнаша. Бу максатларга 10 млн сум бүленгән. Матди-техник база, кадрлар составы белән тәэмин итү өчен чыгымнар таләп ителми. Өлкәннәрне компьютер серләренә төшендерү әзерлекле матди-техник базада - урта һәм урта –махсус белем бирү учреждениеләрендә алып барылачак. Әлегә 200 гә якын уку йорты күз алдында тотыла. Бу эшкә мөгаллимнәр җәлеп ителәчәк. Финанслар аларның хезмәтенә түләүгә тотылачак.

Айрат Шәфигуллин ассыклаганча, яңа проектта катнашучы пенсионерларга яшь буенча бернинди чикләүләр юк, бары теләк булу җитә. Алар төркемнәргә тупланып, яшәү урынына якын мәктәпләрдә укытылачак. Дәресләр көннең икенче яртысында оештырылачак. Министр сорау зур булганда, алга таба әлеге проектның дәвам итәчәген кире какмады. “Республикада 1 млн. нан артык пенсионер яшәвен исәпкә алсаң, бу әле олы юлның башы гына”, - ди ул.