Рөстәм Миңнеханов: "ТР буенча РФ Тикшерү комитеты Тикшерү идарәсе бик яхшы нәтиҗәләргә ирешә алды"

Бүген Казанның “Корстон” комплексында ТР Президенты Рөстәм Миңнеханов катнашында Россия Тикшерү Комитетының ТР буенча идарәсенең киңәйтелгән коллегия утырышы узды. Аның эшендә ТР буенча федераль инспектор Рөстәм Идрисов, ТР Эчке эшләр министры Әсгать Сәфәров, ТР прокуроры Кафил Әмиров, Җәзаларны үтәү федераль хезмәтенең ТР буенча идарәсе башлыгы Дәүфит Хәмәдишин, Наркотиклар әйләнешен контрольдә тоту буенча федераль хезмәтнең ТР буенча идарәсе җитәкчесе Фаяз Шабаев, Федераль Куркынычсызлык Хезмәтенең ТР буенча идарәсе башлыгы Александр Антонов, ТР Югары Суды Рәисе Илгиз Гыйләҗев һәм башкалар катнашты. Төп доклад белән идарә башлыгы Павел Николаев хисап тотты.

Рөстәм Миңнеханов билгеләп узганча, 2011 нче ел республика өчен шактый уңышлы ел булды, планлаштырылган программалар тормышка ашты, яңа проектлар гамәлгә ашырылды. Татарстан төрле тармакларда югары күрсәткечләргә иреште, шул рәвешле Россия төбәкләре арасында лидер субъектларның берсенә әверелде. Республикада югары технологияле производстволар сафка басты, нефть химиясе, автомобиль төзелеш тармакларында төрле проектлар булдырылды, кече һәм урта бизнес чәчәк ата, агросәнәгать комплексы казанышлары сөендерә. Икътисади потенциал социаль мәсьәләләрне дә хәл итәргә булыша. “Әмма төп критерий булып, Татарстан халкының яшәү сыйфаты санала. Гражданнарның хокукларын, ирекләрен, законлы мәнфәгатьләрен яклау – төп бурычларның берсе. Билгеле Татарстанның хокук саклау органнары шушы бурычны үтәү юлында”, - ди Президент.

Рөстәм Миңнеханов билгеләп узганча, Татарстанда җинаятьчелек дәрәҗәсе ил күләмендә чагыштырганда түбәнрәк. “Былтыр республика территориясендә теркәлгән җинаятьләрнең гомуми саны 6 процентка кимрәк, кискен һәм аеруча кискен җинаятьләр саны 8 процентка ким”, – дип хәбәр итте ул.

“Узган ел сезнең өчен мөстәкыйль орган буларак яши башлавыгыз белән тарихка кереп калачак. Сез хокукый тәртип урнаштыру өлкәсендә үз урыныгызны табып, яңа структура буларак мөрәҗәгать итәргә кыюлык таптыгыз, дәүләт хакимияте һәм хокук саклау органнары белән тыгыз хезмәттәшлекне җайга салдыгыз”, - дип ассызыклады республика башлыгы. Аның әйтүенчә, кыска вакыт эчендә тикшерү идарәсе зур күрсәткечләргә иреште. “Коррупция юнәлешендәге җинаятьләрне тикшерүгә җитди өлешегезне кертәсез, коррупция чагылыш тапкан җинаятьләрне фаш итү күрсәткечләре дә артты һәм бу күңелгә оптимизм өсти. Җинаятьләр турындагы гаризаларны тикшерү нәтиҗәлелеге артты, судлар тарафыннан аклау хөкемнәре азрак чыгарыла башлады. Өстәмә тикшерү өчен кире кайтарылган эшләр саны да күпкә кимеде”, - дип, Рөстәм Миңнеханов идарә хезмәткәрләренә карата мактау сүзләрен ирештерде.

“Узган елда сез үз алдыгызыга куелган бурычларны хәл итүгә ирештегез. “Булгария” фаҗигасендә хокук саклау органнарының уртак тырышлыгы, җайга салынган хезмәттәшлеге сизелде. Оператив һәм хезмәт эшчәнлегенең төп нәтиҗәләре буенча Татарстанның Тикшерү идарәсе Россия Тикшерү комитетының иң яхшы бүлекчәләренең берсе”, - дип ассызыклый Татарстан Президенты.

Татарстан башлыгы билгеләп үткәнчә, агымдагы елда идарәгә кискен һәм аеруча кискен җинаятьләрне ачыклауга, балигъ булмаган үсмерләргә карата җинаятьләрне тикшерүгә һәм коррупция белән көрәшкә игътибарны көчәйтергә кирәк булачак. Ул басым ясаганча, коррупция җинаятьләре республика абруена тап төшерә.

Рөстәм Миңнеханов ТР Югары Ослан районының элеккеге башлыгы Александр Тимофеев эше турында искәртеп узды. Мәгълүм булганча, кичә ТР Югары Суды аны 300 миллион сумлык штрафка тартты. “Россиядә мондый суд карарларының булганы юк иде әле. Бу барыбыз өчен дә җитди сигнал. Моннан соң барлык коррупция җинаятьләре өчен кырыс җәза биреләчәк”, - дип кисәтте Президент.

Ул дәүләт хакимиятенә каршы булган, аның тотрыклыгыгына зыян салырга теләгән, экстремизмны пропагандалаган, милли һәм дини нәфрәт һәм дошманлык уяткан затларны җаваплылыкка тарту әһәмиятенә дә басым ясады.

Тикшерүчеләр массакүләм мәгълүмат чаралары белән дә тыгыз элемтәдә торырга тиеш, дип саный республика җитәкчесе. “Журналистлар белән эш һәм объектив мәгълүмат тарату җәмгыятьнең уңай мөнәсәбәтен формалаштыра”, - дип белдерде Рөстәм Миңнеханов.

“Тикшерүчеләр җинаятьчелеккә каршы көрәштә алгы сафта тора. Сезнең һөнәрдә профессионализм һәм компетентлык кебек сыйфатлар өстен санала. Һәр җинаять эше артында кеше язмышы һәм кайгысы тора, бу очракта кешелеклелек сыйфаты калкып чыгарга тиеш. Тикшерүдә төпченү һәм нечкәлекләргә төшенү әдәплелек, риясызлык, гаделлек кебек сыйфатлардан берничек тә өстен булырга тиеш түгел”, - дип җөпләде Татарстан Президенты чыгышын.

Рөстәм Миңнеханов идарә хезмәткәрләренә һөнәри уңышлар, сәламәтлек теләп, хезмәт алдынгыларына дәүләт бүләкләрен тапшырды.