Татарстан Президенты Халыкара тһэквондо федерациясе генераль сәркатибе белән очрашты

Бүген Татарстан Президенты Рөстәм Миңнеханов Халыкара тһэквондо федерациясе делегациясе белән очрашты. Делегацияне WTF генераль секретаре Джин Сук Янг җитәкли.

WTF делегациясе Казанга республика башкаласында тһэквондо буенча Ауропа Олимпия алды квалификация турнирын уздыру өчен кичә килде. 27-29 гыйнвар көннәрендә Көрәш сараенда узачак турнирда 200 дән артык спортчы катнашыр дип көтелә, алар Лондон Олимпиадасына эләгү өчен көрәшәчәк. Турнирда Россия җыелма командасы составында Татарстан спортчылары да катнаша.

Бүгенге очрашуны ачып, Рөстәм Миңнеханов кунакларны сәламләде һәм мондый ярышларны үткәрүнең республика өчен зур мәртәбә булуын билгеләп үтте. “Әлеге ярышлар республикада тһэквондо үсешенә ярдәм итәр һәм Универсиадага әзерлектә тагын бер адым булыр дип өметләнәм”, - диде Татарстан Президенты.

Республика башлыгының сүзләренә караганда, көрәш физик көчне арттырып кына калмый, рухи сыйфатлар, өлкәннәргә карата хөрмәт хисен дә тәрбияли.

Рөстәм Миңнеханов Джин Сук Янгка соңгы елларда республиканың спорт вакыйгаларына зур игътибар бирүен билгеләп үтте. “Мондый зур ярышларның һәркайсы – гаять зур тәҗрибә ул”, - диде Татарстан башлыгы.

ТР Президенты билгеләп үткәнчә, Татарстанда тһэквондо буенча 25 тренер эшли, 14 спорт мастеры шөгыльләнә. “Татарстан вәкилләренең Россия җыелма командасына керүе бик тә куандыра, әмма яңа нәтиҗәләр хакында да уйларга кирәк”, - дип саный Рөстәм Миңнеханов. Аның сүзләренә караганда, Татарстанда, бигрәк тә Казанда тһэквондо белән шөгыльләнү өчен бик яхшы шартлар тудырылган.

Үз чиратында, Джин Сук Янг Казанда Ауропа Олимпия алды квалификация турниры үткәрү турындагы тәкъдиме өчен Татарстан җитәкчелегенә рәхмәт белдерде. Халыкара тһэквондо федерациясе генераль секретаре турнирны үткәрү Татарстанга яңа тәҗрибә китерәчәгенә һәм республикада тһэквондо үсешенә ярдәм итәчәгенә ышаныч белдерде.