Татарстан 2012 елда фермерлык хуҗалыкларына ярдәм итү буенча ике федераль программада катнашачак

Быел Татарстан авыл хуҗалыгы өлкәсендә 2012-2014 елларга исәпләнгән максатчан ике федераль программада катнашырга җыена. Аның берсе “Эшен башлаучы фермер”, икенчесе – “Гаилә фермасы” дип атала. ТР Премьер-министры урынбасары -авыл хуҗалыгы һәм азык-төлек министры Марат Әхмәтов сүзләренә караганда, анда катнашырга теләк белдерүчеләр конкурс нигезендә сайлап алыначак. Эшен башлап кына җибәргән фермерларга федераль казнадан каралган грант ярдәме күләме 1 млн 705 мең сумга кадәр. Аграр министр бу хакта бүген ТР Министрлар Кабинетында Премьер-министр Илдар Халиков рәислегендә узган киңәшмәдә бәян итте.

Аның белдерүенчә, республикада бүгенге көндә фермарларга җирләрне үзләштерүдә бюджет ярдәме күрсәтү дә дәвам итә. Министрлык счетларында шул максатларга 14 млн сумнан артык финанслар тупланган. Бу сумманы 2012 ел лимитлары исәбенә арттырып та була.

Марат Әхмәтов сүзләренә караганда, бүгенге көндә республикада төзелгән гаилә фермалары саны 400 гә якынлашкан. Тик аларның барысын да югары технологияле дип әйтеп булмый әле. Ә бюджет ярдәме югары технологияле фермаларга гына күрсәтелә. Республиканың көньяк-көнчыгыш төбәгендә “Татнефть” ААҖ ярдәме белән гаилә фермалары төзелеше дә дәвам итә: 200 гә кадәр фермерга терлекчелек фермаларының металл конструкциясе комплекты бүленә.

ТР Президенты Рөстәм Миңнеханов муниципаль районнар башлыкларына җирле бюджетларда гаилә фермалары төзелешенә ярдәм өчен финанслар карарга кушкан иде. “Кредит ресурслары мөмкинлекләрен дә кече формадагы хуҗалыкларны үстерүдә мөмкин кадәр күбрәк кулланачакбыз”, - ди министр. 2011 елда гомуми суммасы 4,6 млрд сумлык 20 меңнән артык шундый кредит бирелгән.

Марат Әхмәтов узган ел авыл җирендәге эшмәкәрләр өчен “Лизинг-грант” программасы ярдәме сизелерлек булды, дип исәпли. Фермерлар, аларның ассоциациясенең күпсанлы мөрәҗәгатьләрен күздә тотып, бүгенге киңәшмәдә ул Премьер-министрга кече бизнес өчен сөтне беренчел эшкәртү һ.б. җиһазлар буенча лимитны арттыруны сорап мөрәҗәгать итте.