Искәндәр Мөфлиханов: Татарстан белән икътисадый мөнәсәбәтләрне Европа илләре дә, Азия илләре дә урнаштырырга тели

Быел май азагы-июнь башларында Казанда, Азия-Тын океан икътисади хезмәттәшлеге илләре лидерлары саммиты кысаларында, 40 ка якын чара оештырылачак. АТЭС илләре сәүдә министрлары очрашуы шулар арасында үзәк чараларның берсе булачак. Быелгы саммит үзе 1-8 сентябрь көннәрендә Владивостокта уза. Бу хакта бүген журналистларга Хөкүмәт йортында узган брифингта ТР Президентының Тышкы элемтәләр департаменты директоры-ТР Президентының халыкара мәсьәләләр буенча ярдәмчесе Искәндәр Мөфлиханов хәбәр итте. Очрашуның темасы исә Татарстан делегациясенең Давос Халыкара икътисади форумында катнашу нәтиҗәләренә багышланган иде.

25-29 гыйнвар көннәрендә узган быелгы икътисади форум “Зур трансформация: яңа модельләр формалаштыру” дигән темага багышланган. Үсеш һәм мәшгульлек, лидерлык һәм инновацияләр, социаль һәм технологик, тотрыклылык һәм ресурсларны файдалану модельләре анда фикер алышуның төп юнәлешләре булган.

Ауропа берлеге зонасындагы катлаулы икътисади вазгыять җыен мохитенә үз эзен салган. Искәндәр Мөфлиханов белдергәнчә, Ауропа илләре лидерлары форумда моңа кагылышлы фаразларын бик сак белдергән. Шулай да форумда катнашучыларның күбесе 2012 елның Еврозона өчен гаять катлаулы елларның берсе булачагын искәрткән. Пленар утырышта чыгыш ясаган ФРГ канцлеры Ангела Меркель сүзләрендә дә киеренкелек ноталары яңгыраган. Әмма мондый вазгыять кенә икътисади хезмәттәшлек перспективаларын барлауга киртә була алмый. “Тарих исбатлаганча, төрле шартларда да уңышка ирешеп була. Ауропа илләре дә икътисади кыенлыкларга карамастан, сату базарын эзли”, - ди Искәндәр Мөфлиханов.

ТР Президентының халыкара мәсьәләләр буенча ярдәмчесе Давос форумында катнашучы хакимият структуралары , бизнес-элита вәкилләренең саны арта баруга игътибар юнәлтте. Быел VIP -катнашучылар саны гына да 2600 гә җиткән. “Бу мәйданда демократик мохит тудырыла, форматы да бик уңайлы. Биредә катнашудан алынган энергия эшлекле елны җайга салырга ярдәм итә”, -ди ул.

Татарстан Президенты Рөстәм Миңнехановның, гомумән республика делегациясенең, быел Давос икътисади форумында бишенче тапкыр катнашуы. Бу юлы форумга Свердловский өлкәсе вәкилләре килүгә карамастан, Россия төбәкләре җитәкчеләреннән бары ТР Президенты гына булган. Искәндәр Мөфлиханов ныклы икътисади үсештә булган Татарстанның халыкара аренада ныклап таныла баруының 2005 елдан башлануын ассызыклап, 2013 елгы Казан Универсиадасының, 2015 елда узачак су спорты төрләре буенча дөнья чемпионатының һ.б. моңа яңа этәргеч бирүен белдерде. “Икътисадта, спортта, мәгарифтә һ.б. өлкәләрдә танылган Татарстан белән кызыксыну үсә генә бара”, -ди ул.

Татарстан делегациясенең Давос мәйданындагы быелгы очрашуларына килгәндә, алар Универсиадага әзерлек һәм сәнәгый хезмәттәшлеккә кагылышлы булган. Искәндәр Мөфлиханов Давоста сөйләшүләрнең нәтиҗәле булуын искәртеп, күп кенә компанияләрнең килешенгән мәсьәләләрне ныгыту өчен Татарстанга килүен белдерде.

Узган елгы Давоста ТР Президенты Ауропа базарындагы лидерларның берсе булган Швейцариянең коммуналь техника җитештерүче “Бошунг” компаниясе җитәкчелеге белән очрашкан. Андагы сөйләшүләр нәтиҗәсе буларак, “Бошунг” һәм “КАМАЗ” катнашында уртак предприятие төзелгән. Биредә камилләштерелеп, “КАМАЗ” шассиларына урнаштырылган коммуналь техниканың бер өлеше бу кышта Казан урамнарында эшли инде. Быел Давоста “Бошунг” компаниясе президенты белән чираттагы очрашу булып, анда хезмәттәшлекне үстерү перспективалары каралган. Искәндәр Мөфлиханов Универсиада партнерларының берсе булган “Кока-кола” компаниясе вәкилләре белән очрашуны да аерым билгеләп үтте.