Рөстәм Миңнеханов Мәскәүдә "Hyundai" компаниясе тәкъдимнәре белән танышты

ТР Президенты Рөстәм Миңнеханов “Hyundai” компаниясенең 2013 елгы Казан Универсиадасы катнашучыларын ташуга кагылышлы тәкъдимнәре белән танышты.

“Hyundai” компаниясе Казан Универсиадасының транспорт партнеры булу хокукына дәгъва кылучыларның берсе. Бүген Мәскәүдә, ТРның РФ дәге Вәкаләтле вәкиллеге бинасы каршында, “Hyundai” 2013 елгы Универсиада символикасы белән бизәлгән берничә автомобилен: ике җиңел машина, кечерәк фургон һәм 43 пассажир урынына исәпләнгән автобус модельләрен тәкъдим итте.

Рөстәм Миңнеханов автомобильләр, аларның техник характеристикалары белән танышып чыккач, вәкиллек бинасында “Hyundai Motor Company”ның Ауропа илләре буенча өлкән вице-президенты Лим Бюн Квон җитәкчелегендәге делегация белән очрашу узды. Очрашуда Татарстан ягыннан 2013 елгы Казан Универсиадасы Башкарма дирекциясе генераль директоры Владимир Леонов, ТР транспорт һәм юл хуҗалыгы министры Ленар Сафин һ.б. катнашты.

Яклар Казанда Универсиада барган чорда спортчыларны, тренерлар составын, ММЧ вәкилләрн, җанатарларны ташу өчен автопарк булдыру мәсьәләсен караган. Күчмә составка яңа, уңайлы, заманча булырга тиеш дигән таләп куела. Белгечләр бәяләвенчә, Казан Универсиадасы ихтыяҗлары өчен төрле дәрәҗәдәге 1000 берәмлектән автомашина кирәк булачак. “Hyundai” компаниясе вәкилләре халыкара дәрәҗәдәге спорт чараларында, шул исәптән футбол буенча дөнья чемпионатында, хезмәт күрсәтү буенча тәҗрибәләре булуын билгеләп үтте.

Алар Казан Универсиадасының транспорт партнеры булу мөмкинлеген Татарстан белән хезмәттәшлектә җитди этап булачак дип саный. Аларны Татарстанда узачак башка халыкара ярышлар – спортның су төрләре буенча дөнья чемпионаты, футбол буенча дөнья чемпионаты матчлары белән бәйле партнерлык та кызыксындыра.

Президент Рөстәм Миңнеханов очрашу барышында компания белән хезмәттәшлек кысаларында бәяләр сәясәте хакында җентекләп фикер алышырга тәкъдим итте. Сөйләшүләрне дәвам итү өчен “Hyundai” вәкилләренең якын араларда Казанга сәфәре планлаштырыла.

Казан Универсиадасы Башкарма дирекциясе генераль директоры Владимир Леонов шул ук вакытта Универсиаданы транспорт белән тәэмин итү буенча автомобиль җитештерүче башка компанияләр белән дә сөйләшүләр баруын искәртә.