Рөстәм Миңнеханов Татарстан предприятиеләре җитәкчеләре белән очрашты

Бүген Татарстан Президенты Рөстәм Миңнеханов Казанда сәнәгать предприятиеләренең сәнәгать һәм экология куркынычсызлыгы өлкәсендә күзәтчелек органнары белән хезмәттәшлеге мәсьәләләренә багышланган киңәшмә үткәрде. Киңәшмәдә ТР Премьер-министры Илдар Халиков, министрлык һәм ведомство җитәкчеләре, республиканың сәнәгать предприятиеләре җитәкчеләре катнашты.

Киңәшмәдә Россиянең Бөтендөнья сәүдә оешмасына кушылуы, шулай ук Татарстан предприятиеләренең экологик күзәтчелек органнары белән хезмәттәшлегенә бәйле мәсьәләләр хакында фикер алышынды. Директорлар ТР икътисад министры Мидхәт Шаһиәхмәтов һәм республика экология министры Артем Сидоров мәгълүмат бирде.

Рөстәм Миңнеханов үз чыгышында билгеләп үткәнчә, республика предприятиеләре җитәкчеләре белән мондый очрашулар Татарстан җитәкчелеге өчен бик тә файдалы. “Без предприятиеләрдә барган процессларны күрәбез, җитәкчеләрне борчыган мәсьәләләрне ишетәбез, аларны үз эшебездә исәпкә алабыз”, - дип белдерде ТР Президенты.

Татарстан башлыгы фикеренчә, республика предприятиеләренә Россиянең Бөтендөнья сәүдә оешмасына керүеннән мөмкин кадәр күбрәк файда алырга тырышырга кирәк. Шул ук вакытта, Рөстәм Миңнеханов билгеләп үткәнчә, халыкара базарларга бары тик көндәшлеккә сәләтле продукция белән чыгарга мөмкин, шунлыктан хәзерге вакытта бизнеска республика җитәкчелеге белән берлектә Татарстан предприятиеләренең көндәшлеккә сәләтлелеген арттыру өчен адымнар билгеләргә һәм гамәлгә ашырырга кирәк.

Рөстәм Миңнеханов фикеренчә, экологик куркынычсызлык мәсьәләләрендә федераль, республика һәм муниципаль хакимият органнары арасындагы хезмәттәшлекне җайга салырга кирәк. Татарстан Президенты фикеренчә, хакимиятләргә бизнес белән берлектә предприятиеләрнең экологик куркынычсызлыгын арттыру буенча планлы эш алып бару зарур.

Татарстан башлыгы шулай ук 2011 елга нәтиҗәләр ясады. Узган ел 1,3 триллион сумлык продукция җитештерелгән, тулаем төбәк продукты – 1,25 триллион сум, төп капиталга инвестицияләр 365 миллиард сум тәшкил иткән. “Без 2016 елга тулаем төбәк продуктын 2 триллион сумга җиткерү бурычын хәл итәрбез дип ышанам”, - диде Р.Миңнеханов.

Очрашу ахырында ул предприятие җитәкчеләренә рәхмәт белдерде. “Татарстанның уңышында сезнең өлешегез зур, - дип мөрәҗәгать итте директорларга Рөстәм Миңнеханов. – Сезгә уңышлар теләп калам”.