Татарстан Президенты Казан үзәгендә төзелеш объектларын карады

Бүген Татарстан Президенты Казан үзәгендә төзелеш объектлары белән танышты. Республика башлыгы ТР башкаласының тарихи өлешендәге вәзгыять белән танышты. Президент белән бергә Казан үзәгенә шәһәр башлыгы Илсур Метшин, Татарстан прокуроры Кафил Әмиров, ТР архитектура һәм ТКХ министры Ирек Фәйзуллин, ТР Президенты ярдәмчесе Олеся Балтусова да юл тотты.

Беренче булып Бехтерев һәм Зоя Космодемьянская урамнары киселешендәге төзелеш мәйданчыгы тикшерелде. Биредә ике коммерцияле бина төзелә. Алар арасында Варвара Дружинина йорты урнашкан.

Лесгафт урамы 12 йортта урнашкан бина да артык күп катлы. Күрше йортлар күп дигәндә 6 катлы, ә яңа йорт 7-катлы булачак. Татарстан Президенты йортны 6 кат белән чикләргә генә тәкъдим итте.

Некрасов урамындагы кунакханә проекты архитектура белгечләре тарафыннан хупланган. Бүген ТР Президенты төзүче компания вәкилләре белән очрашты һәм 5 катлы кунакханә проектын шулай ук хуплады.

Нариманов урамы 52 адресы буенча урнашкан иске агач йорт архитектура һәйкәле генә түгел. Ул тарихи әһәмияткә дә ия. 1902 елда төзелгән әлеге йортта татар язучысы Галиәсгар Камал яшәгән. Миңнеханов фикеренчә, әлеге йортны һичшиксез сакларга кирәк.