Рөстәм Миңнеханов: "Балуы районына берничә мәсьәләне хәл итәргә кирәк"

Бүген Татарстан Республикасы Президенты Рөстәм Миңнеханов көннең икенче яртысында Баулы муниципаль районында булды. Республика башлыгы берничә объект белән танышты һәм 2011 елдагы социаль-икътисади үсеш нәтиҗәләре һәм 2012 елга билгеләнгән бурычлар буенча Баулы муниципаль район Советы утырышында катнашты.

Рөстәм Миңнеханов иң беренчеләрдән булып 2009 елда төзелгән заманча күп профильле предприятиедә - «Татнефть-кабель» ААҖндә булды.

ТР Президенты шулай ук Баулы үзәк район хастаханәсенең узган ел сәламәтлек саклау өлкәсен модернизацияләү программасы кысаларында реконструкцияләнгән кабул итү бүлеге белән танышты. Кабул итү бүлеге базасында заманча, яхшы җиһазландырылган өченче дәрәҗә травматология үзәге булдырылган, аңа 4 реанимобиль хезмәт күрсәтә.

Республика башлыгына Үзәк район хастаханәсенең үсеш концепциясе тәкъдим ителде. Концепция нигезендә, хәзерге вакытта хастаханә урнашкан 8 бинаның икесе генә калачак: иң иске биналар (аларның кайберләре узган гасырның 50 нче елларында ук төзелгән) бушатылачак.

Шуннан соң ТР Президенты Мәдәният сараенда район предприятиеләре хакында сөйләүче стендларны карады.

Баулы районы башлыгы Альберт Хәмидуллин утырышта ясаган чыгышында 2011 елдагы социаль-икътисади үсеш нәтиҗәләренә тукталды. Ул хәбәр иткәнчә, 2011 елда Баулы муниципаль районының тулай территориаль продукты 14 миллиард 111 миллион сум (2010 елда – 13 миллиард 465 миллион сум) тәшкил иткән, үсеш темпы - 104,8 процент.

“Республика Икътисад министрлыгының ТР муниципаль берәмлекләре йомгаклау рейтингындагы рәсми мәгълүматлар буенча, 2011 елда Баулы районы 7-8 нче урыннарны били”, - диде Альберт Хәмидуллин.

Аның сүзләренә караганда, узган елда эре һәм урта предприятиеләрдә айлык уртача хезмәт хакы 17 мең сум чамасы тәшкил иткән.

Районның төзелеш тармагы хакында сөйләгәндә, докладчы 2011 елда 19 мең квадрат метр торак мәйданы (шул исәптән, гомуми мәйданы 16 мең квадрат метрдан артык тәшкил иткән 146 шәхси йорт һәм 2806 квадрат метрлы 3 күпфатирлы йорт) сафка бастырылуы хакында хәбәр итте.

Утырышта чыгыш ясаучылар район халкын борчыган кайбер мәсьәләләрне билгеләде. Мисал өчен, республиканың Баулы районында сәламәтлек саклау тармагында квалификацияле кадрлар җитми. Шулай ук Баулы халкы район җитәкчелегенә торак-коммуналь хуҗалыгына кагылышлы мәсьәләләр буенча шактый еш мөрәҗәгать итә.

Утырышта катнашучылар алдында Татарстан Президенты Рөстәм Миңнеханов чыгыш ясады. Ул республиканың социаль-икътисади үсеше хакында сөйләде, 2011 елның Татарстан өчен уңышлы ел булуын билгеләп үтте.

Рөстәм Миңнеханов ассызыклап үткәнчә, республикада халыкның тормыш сыйфатын арттыру өчен икътисадны үстерергә кирәк. Президент нефть чыгаруны тотрыклыландыруны, нефть эшкәртү һәм нефть химиясен үстерүне, автомобиль кластерын киңәйтүне төп үсеш юнәлешләре дип атады. “Татарстан Россиянең башка төбәкләре арасында лаеклы позицияләрне били”, - диде ул.

Президент “Алабуга” махсус икътисади зонасында резидентлар санының 26 га җитүе хакында сөйләде. Рөстәм Миңнеханов Татарстанда гамәлгә ашырыла торган «ТАНЕКО», «Аммоний» кебек киң колачлы проектлар хакында хәбәр итте.

Рөстәм Миңнеханов Татарстанда авыл хуҗалыгының кече формаларын үстерү, күпфатирлы торак йортларны капиталь ремонтлау һәм торак төзелеше буенча киң колачлы программаларны гамәлгә ашыру хакында да сөйләде. ТР Президенты 2011 елда республикада күп еллар эчендә беренче тапкыр халыкның табигый артуы теркәлүен аерым билгеләп үтте.

Моннан тыш, республика башлыгы эшкуарларның урта сыйныфын формалаштыру кирәклеге турында белдерде: республикада кече һәм урта бизнесны үстерү өчен тулы бер инфраструктура – технопарклар, бизнес-инкубаторлар булдырылган. Республика инвесторлар өчен җәлеп итүчән булырга тиеш. Баулы районы хакында сөйләгәндә, Рөстәм Миңнеханов районга инвесторларны җәлеп итү буенча актив эшләргә чакырды. “Барлык мөмкинлекләрдән дә файдаланып, бу юнәлештә эшне көчәйтергә кирәк”, - диде ул.

Рөстәм Миңнеханов Баулы халкына бүген кузгатылган проблемаларны хәл итәргә вәгъдә итте.

Үз чыгышын тәмамлап, Татарстан Президенты иҗтимагый-сәяси торыклылыкны саклау Татарстан өчен иң мөһиме булуын ассызыклады.

Баулы муниципаль район Советы утырышында “Татнефть” ААҖ генераль директоры Шәфәгать Тәхаутдинов, Татарстан муниципаль берәмлекләр Советы рәисе Минсәгыйть Шакиров, республика министрлыклары һәм ведомстволары җитәкчеләре катнашты.

Чара Баулы районында яшәүчеләргә бүләкләр тапшыру белән төгәлләнде. Бүләкләрне Рөстәм Миңнеханов тапшырды.