Рөстәм Миңнеханов: "Балтач районына икътисадның яңа юнәлешләрен үстерергә кирәк"

Бүген Татарстан Республикасы Президенты Рөстәм Миңнеханов Балтач районында булды. Президент бу җирлектәге визитын узган уку елында гына үзенең ишекләрен ачкан Кече Лыза авылында төзелгән яңа мәктәп белән танышудан башлады. Әлеге мәктәп бик кыска срокларда, фәкать 1 җәй эчендә халык соравы буенча салынды. Рөстәм Миңнеханов уку кабинетларында, спортзалда, ашханәдә булып, аларның җиһазлануына олы бәя бирде, укучылар һәм укытучылар белән сөйләшеп яңа уңышлар теләде. Балтачта исә ул иң беренче булып халык белән аралашты, шәхси эшмәкәрләр һәм сәнәгать предприятиеләре җитештергән товарлар күргәзмәсе белән танышып, аларга олы бәя бирде.

Район үзәгендә өр-яңадан төзекләндерелгән мәдәният сараенда булып, ТР Президенты биредә иҗат эшләренең ничек оештырылуы белән танышты һәм коллективка 1 миллион сумлык сертификат тапшырды.

Аннан соң Рөстәм Миңнеханов Балтач муниципаль район Советының 2 нче чакырылыш 10 нчы утырышы эшендә катнашты.

Биредә «2011нче елда районның социаль-икътисади үсеш программасының үтәлеше һәм 2012нче елга бурычлар турында» доклад белән район Советы рәисе Марат Зарипов чыкты.

Утырышта ТР Президенты Рөстәм Миңнеханов чыгыш ясап, анда катнашучыларны республиканың бүгенге халәте һәм киләчәккә бурычлар белән таныштырды. Илебез һәм республикабыз алып бара торган сәясәтне бәян итте, балтачлыларның хезмәтен югары бәяләп үзенең рәхмәтен җиткерде.

Рөстәм Миңнеханов очрашу ахырында бертөркем иптәшләргә хөкүмәт бүләкләре тапшырып, нык сәламәтлек һәм бәхет теләде.

Президент белән бергә Балтач җирлегендә очрашуларда ТР Премьер министры урынбасары - авыл хуҗалыгы һәм азык-төлек министры Марат Әхмәтов, ТР муниципаль берәмлекләр Советы рәисе Минсәгыйть Шакиров, мәдәният министры Айрат Сибагатуллин, мәгариф һәм фән министры Альберт Гыйльметдинов һәм башка рәсми затлар катнашты.