ТР Президенты Мамадыш районының терлекчелек комплексларын карады

Бүген ТР Президенты Рөстәм Миңнеханов Мамадыш муниципаль районына сәфәрен 850 еллык тарихы булган Түбән Ушма авылыннан башлады. Түбән Ушма райондагы иң эре торак пункт санала. Биредә бүген 380 хуҗалык исәпләнә. Авылның икътисади-социаль үсешенә бирегә 3 ел элек инвестор булып килгән Рифат Мотыйгуллин зур өлеш кертә.

Ул җитәкчелек иткән “Азык-төлек программасы” (“Продовольственная программа”) җәмгыяте бүген 7573 га мәйдандагы авыл хуҗалыгы биләмәләрен эченә ала. Шуның 4717 га сөрү җирләре. Президент Рөстәм Миңнеханов һәм аны сәфәрендә озатып йөрүче затлар биредәге заманча терлекчелек комплексы белән танышты. Бүгенге көндә анда 2200 баш мөгезле эре терлек исәпләнә (1800 е савым сыеры). Савым көтүен нәселле терлек исәбенә яңарту эшенә алынганнар биредә. Америкадан шундый 1400 баш нәселле терлек кайтарылган. Җәмгыять 800 бозауга исәпләнгән яңа бозау фермасын да сафка бастырган. Соңгы 2 елда хуҗалыкны үстерүгә 500 млн сумнан артык инвестицияләр салынган. Моннан тыш, үсемлекчелек өчен сугару программасы буенча өч сугару агрегаты сатып алынган. Рифкать Мотыйгуллин районда 2000 елда үз эшен казылык цехыннан ачып җибәргән эшмәкәр. Бүген бу цех 60 төрдән артык казылык һәм итле деликатеслар җитештерә. Узган ел 3900 тонна продукция җитештереп, 651 млн сумлык продукция саткан. Биредә җитештерелгән продукция ел саен “Татарстанның иң яхшы товары” бәйгесендә катнашып, лауреат була. Мотыйгуллин инвестицияләгән икмәк-күмәч һәм кондитер эшләнмәләр комбинаты да эшли.

Бүген дәрәҗәле кунаклар “Азык-төлек программасы” җәмгыятендәге заманча комплекста булып, терлекчелектә һәм үсемлекчелектә республика хуҗалыкларында кулланылучы алдынгы технологияләр, аерым алганда, сакчыл җитештерү технологияләрен кулланылышка кертү этаплары, республика хуҗалыкларының социаль-икътисади үсеш күрсәткечләре, терлекчелектә, үсемлекчелектә кулланылучы яңа техника һәм җиһазлар күргәзмәсе белән дә танышты.

Президент шулай ук Түбән Ушмада Рифат Мотыйгуллин төзеткән күпфункцияле яңа спорт комплексын карады. 2009 елда төзелә башлаган объект бүген инде кулланылышка әзер. Аның смета бәясе 28,5 млн сум белән бәяләнә.

Соңрак Президент һәм аны озата йөрүчеләр Каменный Починок авылында Рәсимә Вахитованың гаилә фермасы белән танышты. 100 баш сыер асрала торган терлекчелек комплексы төзекләндерелеп, проектка 8,8 млн сум финанслар салынган. Аларның 2,5 млн сумын кредит ресурслары, 1 млн сумын субсидия, 697 мең сумнан артыгын лизинг, 4 млн сумын эшлекле гаиләнең шәхси финанслары тәшкил иткән. Биредә елына 500 тонна сөт җитештерү, 450 тонна продукция сату, 90 баш үрчем алу ниятләнә.

Бу минутларда ТР Президенты Рөстәм Миңнеханов Мамадыш районы Мәдәният йортында 2011 елда авыл хуҗалыгы нәтиҗәләренә багышланган республика семинар-киңәшмәсенең пленар утырышында катнаша.