Татарстан Президенты Сарманның алдынгы предприятиеләрендә булды

Бүген Татарстан Президенты Рөстәм Миңнеханов Сарманда “Агромастер” производство компаниясендә, “Сарман-ит” җитештерү кооперативында һәм “Шәфкать” социаль хезмәт күрсәтү үзәгендә булды. Шулай ук республика башлыгы район Мәдәният йортында күргәзмәдә инвестиция проектлары белән танышты.
Бүген “Сарман-ит” җитештерү кооперативында Татарстан Президенты Рөстәм Миңнехановка пилмән ясау линиясе, шулай ук 2012 елда эшли башлаган казылык эшләнмәләре чыгару буенча яңа цех тәкъдим ителде.
Рөстәм Миңнеханов “Агромастер” компаниясендә производство белән танышты, энергияне саклаучы лампалар белән кызыксынды.
“Шәфкать” социаль хезмәт күрсәтү үзәгендә Татартсан Президенты бүлмәләрне карады, үзәктә яшәүче өлкәннәр белән аралашты. Рөстәм Миңнеханов компьютер дәресләрендә булды һәм яңа компьютер бүләк итте.
Сарман Мәдәният йортында оештырылган инвестиция проектлары күргәзмәсендә Татарстан Президенты район территориясендә тау музее булдыру проектын билгеләп үтте. Рөстәм Миңнеханов “Татнефть” ААҖ генераль директоры Шәфәгать Тәхаутдиновка проектны гамәлгә кую мөмкинлекләрен карарга тәкъдим итте. Республика башлыгы ике беренче сыйныф укучысы белән аралашты, алар мәктәптәге ноутбук мөмкинлекләрен күрсәтте. Рөстәм Миңнеханов укучыларга компьютер техникасын үзләштерүдә уңышлар теләде.
Татарстан Президенты күргәзмәне караганнан соң, Сарман муниципаль районы советы утырышында катнашты