Илдар Халиков Зәйдә авария хәлендәге торактан күчерү программасы буенча фатир алган гаиләләрдә булды

ТР Премьер-министры Илдар Халиков Зәй муниципаль районына эш сәфәре кысаларында гражданнарны авария хәлендәге торак фондыннан күчерү программасы буенча төзелгән йортта (Макаров урамы, 22) яшәүче гаиләләрдә булды.

Әлеге йорт 2009 елның ноябрендә комиссия тикшерүе карары белән авария хәлендәге торак дип табылган. Агачтан салынган ике катлы йортта 4 гаилә - 13 кеше яшәгән. Яңа йорт төзелеше гражданнарны авария хәлендәге торак фондыннан күчерү буенча өстәмә программага кергән.

Яңа йортка күченүчеләр арасында запастагы майор Наил Усманов та бар. Ул 23 ел “Байконур” космодромында хезмәт иткән, Хөкүмәт бүләкләренә лаек булган. Яңа фатирга күченү бәхетенә ирешкән Фиона Николаева исә Ватанны саклаучылар көнендә 75 яшьлеген билгеләп үтәчәк. Ул 14 ел буе фермада, аннары 34 ел Зәй районы медицина учреждениеләрендә санитар булып эшләгән. Үзенең яңа фатирын ул хакимиятнең халык турында кайгырту билгесе дип саный.

2010 елның 1 гыйнварына Зәй муниципаль районы территориясендә авария хәлендәге 5 күпфатирлы йорт (икесе – шәһәрдә, өчесе – авылда) булган. Төп программага гомуми мәйданы 168,9 квадрат метр тәшкил иткән - 2, гражданнарны авария хәлендәге торак фондыннан күчерү буенча өстәмә программага исә 3 күпфатирлы йорт кергән. Гамәлгә ашырылган программаның гомуми нәтиҗәсе мондый: 2011 елда 22 миллион 607 мең 362 сум акча бүлеп бирелгән һәм үзләштерелгән; 42 кеше – 18 гаилә үзләренең торак шартларын яхшырткан.

Аннары Татарстан Хөкүмәте башлыгы Зәй муниципаль район Советы утырышында катнашты.