Рөстәм Миңнеханов: "Теләче районы үзенә яңа максатлар куярга тиеш"

Бүген Татарстан Президенты Рөстәм Миңнеханов эш сәфәре белән Теләче муниципаль районында булды. Биредә ул Теләче муниципаль районы вәкиллекле органы утырышында катнашты. Анда 2011 елдагы социаль-икътисади үсеш нәтиҗәләре каралды һәм 2012 елга бурычлар билгеләнде.

Утырыш башланыр алдыннан республика башлыгы район предприятиеләре һәм халык һөнәрчелеге эшләнмәләре урын алган күргәзмәне карады.

Сессиядә 2011 елда район үсешенә нәтиҗә ясалды. Төп доклад белән республиканың Теләче районы башлыгы Илдус Зарипов чыгыш ясады. Ул 2011 елда район җитәкчелегенең эше икътисадның тотрыклы һәм динамик үсеше нигезендә халыкның тормыш сыйфатын арттыруга; иҗтимагый-сәяси һәм социаль тотрыклылыкны арттыруга юнәлдерелүен билгеләп үтте.

2011 елда 4,8 миллиард сумлык продукция җитештерелгән, бу узган елгы дәрәҗәгә туры килә. “Әмма сәнәгый җитештерү индексы күрсәткечләрен анализлаганда тармаклар арасында аерма күзәтелә: авыл хуҗалыгы производствосы күләмнәренең үсеше 2010 елга карата 123 процент тәшкил иткән, сәнәгать һәм төзелештә исә җитештерү күләмнәре кимегән”, - дип хәбәр итте район башлыгы.

Эре һәм урта предприятиеләрнең төп капиталына инвестицияләр 366 миллион сум тәшкил иткән. 2011 елда Теләче муниципаль районында уртача хезмәт хакы 14 мең 760 сум булган. Илдус Зарипов төп инвестицион проектлар хакында сөйләгәннән соң, салым базасының киңәюен, районга инвесторлар җәлеп итүнең, хезмәт хакы фондының артуын һәм авыл хуҗалыгы тармагын үстерүнең район җитәкчелегенең алдагы елларга өстенлекле бурычлар рәтенә керүен ассызыклады.

Теләче районы башлыгы үз докладында социаль тармакта, мәгариф, авыл хуҗалыгы, сәламәтлек саклау өлкәләрендә ниләр эшләнүе хакында сөйләде. Районда физик культура һәм спортка зур игътибар бирелә. Теләче районы спортчылары республика һәм Россия күләмендәге ярышларда призлы урыннар яулый.

“Теләче районының үсеш потенциалы зур. Район халкы эш сөючән, район географик яктан уңайлы урнашкан. Теләче районы җитәкчелегенә үз алларына яңа бурычлар куярга һәа аларны гамәлгә ашырырга кирәк, моның өчен мөмкинлекләр бар”, - дип белдерде ТР Президенты, утырышта ясаган чыгышында.

Теләченең авыл хуҗалыгы районы икәнлеген искәртеп, республика башлыгы агросәнәгать комплексы мөмкинлекләренең тулы күләмдә гамәлгә ашырылмавын ассызыклады. Рөстәм Миңнеханов республика һәм федераль программаларны актив куллану ярдәмендә авылда кече һәм урта бизнесны үстерүнең мөһимлеген искәртте.

“Теләче – шәһәр яны районы, - диде Рөстәм Миңнеханов. – Моннан файдаланырга кирәк. Шәһәргә якын урнашу сезгә җитештерелгән продукцияне Казанга тиз арада китереп җиткерергә мөмкинлек бирә, башкалага керә торган урында агропромпарк төзелә, анда Теләче районы халкы да үз продукциясен сата алачак”.

Р.Миңнехановның сүзләренә караганда, районда проблемалар бар әле. Демографик күрсәткечләр куандырырлык түгел – үлүчеләр саны туучылардан артып китә. Татарстан башлыгы хәбәр иткәнчә, куйган тырышлык нәтиҗәсендә 2011 елда соңгы 20 елда беренче тапкыр республикада халыкның табигый артуы теркәлгән. “Кешеләрнең яшәү һәм эшләү өчен уңайлы шартлар тудырылуына ышанычы булырга тиеш, биредә калу өчен перспективалар бар”, - диде ул.

Рөстәм Миңнеханов башкарган эшләре өчен Теләче халкына рәхмәт белдерде һәм 2012 елда яңа уңышлар теләде. Ул республика җитәкчелегенең авылга, шул исәптән Теләче районына да ярдәм кулы сузарга әзер торуын белдерде.

Очрашу ахырында ТР Президенты район халкына бүләкләр тапшырды.

Утырышта ТР Премьер-министры урынбасары – авыл хуҗалыгы һәм азык-төлек министры Марат Әхмәтов, ТР Муниципаль берәмлекләр советы рәисе Минсәгыйть Шакиров, республика министрлыклары һәм ведомстволары җитәкчеләре катнашты.