Рөстәм Миңнеханов Лаеш районында эш сәфәрендә

Бүген ТР Президенты Рөстәм Миңнеханов Лаеш муниципаль районында эш сәфәрендә. Сәфәр программасында социаль ипотека программасы буенча төзелгән 27 фатирлы торак йортта булу, “Кама” спорт-савыктыру комплексы белән танышу каралган. Әлеге комплекс тәүлеккә 740 кешене кабул итүгә исәпләнгән.

Узган ел Лаеш районында 54,5 мең кв метр мәйданда торак төзелеп, файдалануга тапшырылган. Бөек Ватан сугышы ветераннарының торак шартларын яхшырту программасы кысаларында 2010-2011 елларда Лаешның үзендә һәм Габишев авылында ветераннар өчен ике күпфатирлы йорт сафка бастырылган. Ике ветеран Столбище һәм Усад авылларында яңа шәхси йортларга күчерелгән. Лаеш районында торак шартларын яхшыртуга мохтаҗ ветераннарының ихтыяҗын тулысынча канәгатьләндерү өчен, Усад, Габишев авылларында һәм Лаешта 100 фатирга исәпләнгән тагын 3 йорт төзелә башлаган.

Райондагы социаль объектлар белән танышып чыккач, ТР Президенты район Мәдәният йортында Лаеш муниципаль районы Советы утырышында катнашачак. Утырыш узган ел районның социаль-икътисади үсеш нәтиҗәләренә һәм 2012 елга бурычлар билгеләүгә багышлана.