Рөстәм Миңнеханов Лаешта социаль ипотека программасы буенча төзелгән йортны карады

Бүген ТР Президенты Рөстәм Миңнеханов Лаеш муниципаль районында булды. Республика Президентының эш сәфәре социаль ипотека һәм ветераннарның торак шартларын яхшырту программалары буенча төзелгән йорт белән танышудан башланды.

Республика башлыгы күп балалы Гыйрфановлар гаиләсендә кунакта булды. Эльвира һәм Марат Гыйрфановлар 15 һәм 8 яшьлек ике ул һәм 3 яшьлек кыз тәрбияли. Гаилә социаль ипотека программасында катнашучылар составына 2006 елның маенда, ягъни өченче балалары туганчы кертелә. Эльвира ашыгыч медицина ярдәме станциясендә фельдшер, Марат исә район газ эксплуатация хезмәтендә эшли. Өч бүлмәле фатирга күченгәнче гаилә кысан шартларда ата-атаналары белән бергә яшәгән.

2011 елда Лаеш муниципаль районында 54,5 мең квадрат метр торак файдалануга тапшырылган. Муниципалитет башлыгы Михаил Афанасьевның сүзләренә караганда, бүгенге көндә 200 дән артык ветеран үзләренең торак шартларын яхшырту өчен чиратта тора. 2010-2011 елларда районда (Лаешта һәм Габишевода) әлеге категориягә кергән гражданнар өчен ике йорт төзелгән. Бүген Рөстәм Миңнеханов булган йортта үз вакытында 10 ветеран фатир алган. Хәзерге вакытта Усад, Габишево һәм Лаешта 100 фатирлы тагын 3 йорт төзелә.

Шуннан соң Татарстан Президенты узган елның көзендә ачылган “Кама” спорт-сәламәтләндерү комплексында булды. Бу – соңгы 15 елда районда төзелгән беренче спорт объекты. База комплексында балалар-яшүсмерләр спорт мәктәбе эшли, анда 640 тан артык бала йөзү, шахмат, авыр атлетика, бокс һәм өстәл теннисы белән шөгыльләнә.

ТР Президенты эш сәфәре кысаларында шулай ук Лаеш муниципаль район Советы утырышында катнашты, анда 2011 елда районың социаль-икътисади үсешенә нәтиҗә ясалды һәм агымдагы елга бурычлар билгеләнде.