Татарстан Президенты Рөстәм Миңнеханов "Кояшлы шәһәр" микрорайонындагы "Көнбагыш" балалар бакчасын ачу тантанасында катнашты

Бүген Казанның “Кояшлы шәһәр” микрорайонында Татарстан Президенты Рөстәм Миңнеханов катнашында тантаналы төстә “Көнбагыш” балалар бакчасы ачылды.

Ачылыш тантанасында шулай ук ТР буенча эчке эшләр министры полиция генерал-лейтенанты Әсгать Сәфәров, ТР мәгариф һәм фән министры Альберт Гыйльметдинов, “Кояшлы шәһәр” ҖЧҖ генераль директоры Ильяс Дивеев, “Ак барс банкы” ААҖ Директорлар советы рәисе Роберт Мусин, ТР буенча Эчке эшләр министрлыгы җитәкчелеге, Эчке эшләр бүлеге шәхси составы һәм ветераннар катнашты.

Тантана балалар катнашындагы театральләштерелгән тамаша белән башланды, шуннан соң Татарстан Президенты Рөстәм Миңнеханов сәламләү сүзләре белән чыгыш ясады.

“Бүген бик тә шатлыклы көн. “Кояшлы шәһәр”дә үзләренең яңа йортлары барлыкка килүгә куанучы балалар бик күп. Без балаларга зур игътибар бирәбез – алар безнең киләчәгебез. Мәгариф системасы мәктәпкәчә белем бирүдән башлана – биредә балалар алга таба мәктәптә һәм вузда уку өчен тиешле күнекмәләр ала”, - диде республика башлыгы. Ул соңгы елларда Татарстанда туучыларның артуын билгеләп үтте, шулай ук узган ел республикада “Бәләкәч” программасының уңышлы гамәлгә ашырылуын искәртте, нәтиҗәдә балалар бакчаларында меңләгән яңа урын барлыкка килде.

“Әлеге программаның төп өлеше Казанда гамәлгә ашырылды. Без бу эшне алга таба да дәвам итәчәкбез”, - дип белдерде Р.Миңнеханов. Ул яңа балалар бакчасының шәхси-дәүләт партнерлыгының яхшы үрнәге булып торуын билгеләп үтте, ТР буенча эчке эшләр министры Әсгать Сәфәровка һәм “Ак Барс” банкы вәкилләренә башкарган эшләре өчен рәхмәт белдерде. “Кояшлы шәһәр” микрорайоны Казанда иң үрнәк микрорайонга әверелер дип өметләнәм. Барыгызны да бәйрәм белән котлыйм”, - диде ТР Президенты һәм “Көнбагыш” балалар бакчасына интерактив комплекс һәм ноутбук сатып алу өчен сертификат тапшырды.

“Ак Барс” банкының Директорлар советы рәисе Роберт Мусин үз чыгышында билгеләп үткәнчә, компания кешеләрнең бүгенге көндә моннан 20 яки 10 ел элеккеге кебек яшәргә тиеш түгеллеген аңлый. Без йортларны кешеләр яшәр өчен уңайлы итеп төзергә тиеш. Бу Татарстан икътисадына да файдага гына булачак, чөнки кешеләр торакны биредә сатып алырга тырышачак”, - дип белдерде ул һәм балалар бакчасына җиһаз сатып алу өчен сертификат тапшырды.

“Көнбагыш” балалар бакчасы 2007 елда төзелә башлый. Әлеге мәктәпкәчә учреждение проектының төп инвесторы – “Ак Барс” банкы ААҖ. Генераль подрядчысы - "Ак Барс Строй" ААҖ. Балалар бакчасы территориясенең мәйданы 0,4 гектар тәшкил итә. 1300 квадрат метр мәйданлы ике катлы бина 6 төркемгә исәпләнгән. Мәктәпкәчә учреждениедә балаларны сәламәтләндерү һәм укыту, мәктәпкә әзерләү, шулай ук иҗади мөмкинлекләрен үстерү өчен барлык мөмкинлекләр дә тудырылган.