ТР Премьер-министры татарстанлыларны Ватанны саклаучылар көне белән котлады

Татарстан Республикасы Премьер-министры Илдар Халиков татарстанлыларны Ватанны саклаучылар көне белән котлады.

“23 февральдә Россия илебезнең төп бәйрәмнәреннән берсен – Ватанны саклаучылар көнен билгеләп үтә. Әлеге бәйрәм хәрбиләрнең генә түгел, “Туган ил”, “Ватан”, “бурыч” дигән сүзләргә битараф булмаучыларның да бәйрәме. Ул Кораллы Көчләрнең героик елъязмасын, буыннарның аерылгысыз бәйләнешен, Ватанга тугрылыклы хезмәт итүнең буыннан-буынга күчүче традицияләрен гәүдәләндерә.

Россия тарихы ил чикләрен фидакарьләрчә саклаган күп кенә буын вәкилләренең батырлык һәм кыюлык, рухи ныклык һәм Ватанга мәхәббәт мисалларына бай. Авыр сынау елларында армия һәм флотта хезмәт итүчеләр батырлык, хәрби бурычка тугрылык һәм Ватанга чиксез мәхәббәт үрнәге күрсәтте. Бу көнне без данлы Кораллы Көчләрне хөрмәтлибез. Нәкъ менә алар Россия дәүләтенең тотрыклылык һәм тынычлык үрнәге булып тора. Без Бөек Ватан сугышы ветераннары һәм әфганчылар, солдат һәм офицерларның батырлыгы белән горурланабыз.

Бүгенге көндә илебез җитәкчелеге тарафыннан хәрби хезмәткәрләрне социаль яклау мәсьәләләренә зур игътибар бирелә, аларның һөнәри дәрәҗәсе күтәрелә, хәрби частьләрнең матди-техник җиһазланышы яхшыра. Армия һәм флотның сугышчан әзерлеген тәэмин итү өчен күп көч куйган ветераннарга даими кайгыртучанлык күрсәтелә. Данлы хәрби традицияләр яңадан торгызыла. Үсеп килүче буынны патриотик рухта тәрбияләү өчен күп эш башкарыла.
Республикабыз да илнең оборона сәләтен арттыруга сизелерлек өлеш кертә. Илнең хәрби-сәнәгать комплексына керүче Татарстан предприятиеләре югары потенциалга ия, бу аларга иң катлаулы оборона заказларын да үтәргә мөмкинлек бирә. Без Россия Федерациясе Оборона министрлыгы частьләре һәм бүлекчәләрендә хәрби бурычларын лаеклы үтәүче яшьләребез белән горурланабыз.

Татарстан Республикасы Хөкүмәте һәм шәхсән үз исемемнән сезне Ватанны саклаучылар көне белән чын күңелдән котлыйм. Сезгә һәм гаиләләрегезгә аяз күк йөзе, ныклы сәламәтлек, уңышлар, оптимизм һәм иртәгесе көнгә ышаныч телим”, - диелә котлауда.