Рөстәм Миңнеханов ТР буенча ЭЭМ хезмәткәрләренә "Кояшлы шәһәр"дәге яңа фатирлардан ачкычлар тапшырды

Бүген, Ватанны саклаучылар көнендә, Татарстан эчке эшләр органнары хезмәткәрләренең 54 гаиләсенә Казанның “Кояшлы шәһәр” микрорайонында урнашкан йортта фатир ачкычлары тапшырылды.

Фатир ачкычларын Татарстан Президенты Рөстәм Миңнеханов һәм ТР буенча эчке эшләр министры Әсгать Сәфәров тапшырды. Аңарчы республика башлыгы шулай ук “Кояшлы шәһәр” микрорайонында урнашкан “Көнбагыш” балалар бакчасын ачу тантанасында катнашты.

“Шундый яңа йортлар, балалар бакчаларының төзелүе куанычлы”, - диде Рөстәм Миңнеханов һәм бүгенге көндә эчке эшләр органнарының 1 меңнән артык хезмәткәре торак белән тәэмин ителүен искәртте.

“Бүген Ватанны саклаучылар көне билгеләп үтелә, ә бит нәкъ менә погонлы кешеләр безнең иминлекне тәэмин итә. Барыгызны да әлеге вакыйга – фатир алуыгыз белән котлыйм. “Кояшлы шәһәр” Казанда иң уңайлы һәм куркынычсыз микрорайонга әверелер дип өметләнәм”, - дип ассызыклады ТР Президенты.

“Бәхетнең бәхәссез, вакыт сынавын узган формуласы бар – ул уңайлы йорт, дус гаилә һәм яраткан эш. Әлеге формулада йорт аерым урынны били. Яңа фатир алучыларның барысын да котлыйм. Сез алга таба да гаилә, халык һәм республика бәхете хакына хезмәт итәрсез дип өметләнәм”, - диде үз чиратында Әсгать Сәфәров.

Фатир ачкычлары тапшырганнан соң ТР Президенты Татарстан Республикасы буенча Эчке эшләр министрлыгының Махсус билгеләнүдәге үзәге хезмәткәре Александр Каляшин гаиләсендә кунакта булып, яңа фатир алучыларга – суыткыч, ә балаларына электрон китап һәм зур курчак бүләк итте.

“Кояшлы шәһәр” микрорайонының Гариф Ахунов урамындагы 194 фатирлы торак йорт 2007 елда төзелә башлый. Генераль подрядчысы – “Ак БарсСтрой” ҖЧҖ. Төзелеш проекты «Татинвестгражданпроект» дәүләт унитар предприятиесе тарафыннан эшләнгән.

23 – бер бүлмәле, 25 – ике бүлмәле һәм 6 өч бүлмәле фатир файдалануга тапшырылган. Торакның гомуми мәйданы 12 мең квадрат метрдан артып китә.

2013 ел ахырына кадәр инвестицион проект кысаларында Татарстан Республикасы буенча Эчке эшләр министрлыгы өчен 409 фатир төзү күздә тотыла, аның 249 ы – “Кояшлы шәһәр” (Казан), 160 ы “Яшьлек” (Чаллы) микрорайонында.

“Кояшлы шәһәр” инвестицион проекты 2005 елның февралендә старт алды. 2007 елдан алып бүгенге көнгә кадәр биредә эчке эшләр органнарының 328 гаиләсенә фатир ачкычлары тапшырылды.