Рөстәм Миңнеханов “Татнефть” Директорлар советы утырышын үткәрде

Бүген Әлмәттә Татарстан Республикасы Президенты Рөстәм Миңнеханов рәислегендә “Татнефть” ААҖ Директорлар советының чираттагы утырышы узды.

Компаниянең матбугат хезмәте хәбәр иткәнчә, утырышта “Татнефть”нең гыйнвар аенда бюджет үтәлешенә нәтиҗә ясалды һәм 2012 елның март аена бюджет расланды. Утырышта катнашучылар 2011 елда эчке аудит идарәсе эшчәнлеге нәтиҗәләре турындагы мәгълүматны тыңлады. Хисап чорында аның белгечләре тарафыннан компания финанс-хуҗалык эшчәнлегенең төрле мәсьәләләре буенча 11 – планлы һәм 4 планнан тыш тикшерү үткәрелгән. Утырышта катнашучылар 2012-2014 елларга идарәнең стратегик эшчәнлек планын раслады.

“Сакчыл җитештерү” программасын гамәлгә ашыру буенча “ТМС Групп” ҖЧҖ идарәче компаниясенең тәҗрибәсе хакында фикер алышынды.

Директорлар советы 2011 елдагы эшчәнлек нәтиҗәләре буенча компания акционерларының еллык гомуми җыелышын үткәрүгә бәйле кайбер мәсьәләләрне тикшерде.

Утырышта шулай ук “Татнефть” ААҖ эшчәнлегенә кагылышлы башка мәсьәләләр дә каралды.