РФ транспорт министрына Казанда юл хәрәкәте белән автоматлаштырылган идарә итү системасын тәкъдим иттеләр

Бүген Россия транспорт министры Игорь Левитин “Казан юл хәрәкәте белән идарә итү буенча автоматлаштырылган система” муниципаль бюджет учреждениесендә булды. Аны ТР Премьер-министры Илдар Халиков, ТР транспорт һәм юл хуҗалыгы министры Ленар Сафин, ТР төзелеш, архитектура һәм торак-коммуналь хуҗалык министры Ирек Фәйзуллин, Казан мэры Илсур Метшин һ.б. озатып йөрде.

Кунакларга Казанда юл хәрәкәте белән идарә итүнең автоматлаштырылган системасын тәкъдим иттеләр.

Юл хәрәкәте белән идарә итү буенча автоматлаштырылган система – ул хәрәкәт иминлегенә, урам-юл челтәре параметрларын яхшыртуга, транспорт бөкеләрен киметүгә һәм экологик халәтне яхшыртуга юнәлдерлгән программа-техник чаралар комплексы.

Казанның 15 юл чатында датчиклар һәм камералар куелган, хәзер система сынау режимында эшли. Шәһәрдә урам-юл челтәрләре төзекләндерелеп беткәч аларны башка магистраль урамнарында куярга мөмкин. Аның өчен җиһазлар һәм кирәкле коммуникацияләр бар. Универсиадага Казанда бу система транспорт һәм җәяүлеләр хәрәкәте тыгыз булган 96 юл чатында эшләячәк.

Хәзерге вакытта сынау кластерларында уңай якка үзгәрешләр күзәтелә: яңа системалы урамнарда сыйдырышлылык 21 процентка арткан, хәрәкәт агымының уртача тизлеге 18 процент тәшкил итә.

Россия транспорт министры яңа система проектына Зур Казан боҗрасы кертелгәнме дип сорады. Бу магистраль әлеге системаны куллануны исәпкә алып төзекләндерелә дип белдерделәр. Проектны гамәлгә ашыруда Юл хәрәкәте белән идарә итү буенча автоматлаштырылган система учреждениесе белән ЮХИДИнең актив хезмәтәшлек итүе кирәк дип саный Игорь Левитин.