ТР Президенты 2013 елгы Универсиадада куркынычсызлыкны тәэмин итүдә ярдәм сорады

Бүген ТР Президенты Рөстәм Миңнеханов РФ Премьер-министрының беренче урынбасары, Уеннарның Оештыру комитеты башлыгы Игорь Шуваловка 2013 елда Казанда узачак Универсиадада катнашучылар һәм кунакларның куркынычсызлыгын тәэмин итүгә федераль бюджеттан 2 миллиард сум күләмендә өстәмә акча бүлеп бирү үтенече белән мөрәҗәгать итте.

Бүген Ратушада РФ Премьер-министрының беренче урынбасары Игорь Шувалов рәислегендә 2013 елгы XXVII Бөтендөнья җәйге универсиадасына әзерлек һәм аны үткәрү буенча Оештыру комитетының 5 нче утырышы узды. Утырышта шулай ук ТР Президенты Рөстәм Миңнеханов, Россия спорт, туризм һәм яшьләр сәясәте министры Виталий Мутко, Россия транспорт министры Игорь Левитин, РФ эчке эшләр министры Рәшит Нургалиев, Халыкара студентлар спорты федерациясенең (FISU) беренче вице-президенты, Россия студентлар спорт берлеге президенты Олег Матыцин һәм башка рәсми затлар катнашты.

Утырышны ачып, Игорь Шувалов спорт объектларының күпчелеге инде кулланылышка тапшырылуын, казанлылар һәм башкала кунаклары тарафыннан файдаланылуын ассызыклады. “Бүген без 2013 елгы Универсиада авылында булдык. Студентлар кампусы Идел буе федераль университеты өчен Уеннардан мирас булып калачак, - диде ул. – Иң катлаулы ике объектта (45 мең урынлы стадион һәм Спортның су төрләре сарае) төзелеш эшләре дәвам итә”.

Эш графигы буенча йөкләмәләрнең үтәлеше хакында сөйләгәндә, Игорь Шувалов: “Эшләр график нигезендә бара, финанслау мәсьәләсендә тоткарлыклар юк”, - дип ассызыклады.

“Тулаем алганда, эш интенсив рәвештә алып барыла. Миңнеханов, Леонов һәм Метшин әлеге проект белән шәхсән шөгыльләнә. Проектны уңышлы алып бара торган команда тупланган”, - дип белдерде Шувалов.

Үз чиратында, Рөстәм Миңнеханов Казандагы Универсиадага 500 көннән азрак вакыт калуын искәртте. “Билгеләнгән барлык эшләрне дә башкарып өлгерергә кирәк. Спорт объектларын төзү эшләре график нигезендә бара. Барысы да вакытында әзер булачагына бернинди шик тә юк”, - дип ышандырды ТР Президенты. Республика башлыгының сүзләренә караганда, транспорт инфраструктурасын әзерләү буенча гаять зур эш башкарыла. “Аэропорттан Казан үзәгенә кадәр 20 минутта” проектына бәйле мәсьәлә хәл ителә. Биредә эш оештырылган. Юл чишелешләре, җәяүлеләр кичүе, метрога килсәк – барысында да эш бара”.

Рөстәм Миңнеханов үз чыгышында хәл итүне таләп иткән ике мәсьәләгә тукталды. “Хәзерге шартларда куркынычсызлык мәсьәләсе аеруча зур әһәмияткә ия. Кытайдагы Уеннарда булганнан соң без кайбер пунктларны яңадан карадык, Кытай партнерлары кулланган кайбер системалы алымнарны кабул итеп алдык. Мин федераль бюджеттан ярдәм сорар идем. Җиһазлар, техник чаралар кирәк – без Федераль куркынычсызлык комитеты, Эчке эшләр министрлыгы тарафыннан расланган тиешле гаризалар әзерләдек. Бу – илебезнең имиджы”.

“Без республика алдына куелган бурычларның барысын да хәл итәчәкбез”, - дип ассызыклады Рөстәм Миңнеханов.

Россия спорт, туризм һәм яшьләр сәясәте министры Виталий Мутко Казанда Универсиадага әзерлекнең барышы турында доклад белән чыгыш ясады. Аның сүзләренә караганда, Уеннар Казанда 2013 елның 6-17 июль көннәрендә узачак, 27 спорт төре буенча барлыгы 351 комплект медаль уйнатылачак. 29 июньдә Универсиада авылын рәсми төстә ачу тантанасы уза. 2012-2013 елларга операция бюджеты 10,6 миллиард сумга якын тәшкил итә.

Игорь Шувалов утырыш тәмамланганнан соң журналистларга биргән интервьюсында Универсиадада куркынычсызлыкны тәэмин итү Уеннарның Оештыру комитеты утырышында тикшерелгән төп мәсьәләләрнең берсе булуын ассызыклады. “Казанда Уеннарны үткәрү өчен күпме генә акча сарыф итсәк тә, Казан күз алдында үзгәрә һәм матурлана дип күпме генә кабатласак та, Уеннарның куркынычсызлыгын тәэмин итү төп мәсьәлә булып калачак, - дип ассызыклады Универсиаданы Оештыру комитеты башлыгы. – Моның өчен безгә бик катлаулы эш башкарырга кирәк. Шулай ук махсус җиһазлар сатып алу зарур. Эчке эшләр министрлыгы бюджетында әлеге чараларны тәэмин итү өчен күпмедер күләмдә акча каралган инде. Бүген билгеләп үтелгәнчә, куркынычсызлыкны тәэмин итү максатларына 2 миллиард сумнан артык акча кирәк”.

“Татарстан җитәкчелеге белән эшләве һәрвакытта да кызыклы. Алар үз өстенә алган йөкләмәләрнең һәркайсын үз вакытында һәм төгәл башкара”, - дип сүзен йомгаклады Игорь Шувалов.

Үз чиратында, Рөстәм Миңнеханов эш графигы тыгыз булуга да карамастан, Казанга килергә вакыт тапкан өчен Игорь Шуваловка рәхмәт белдерде. “Мин әлегә Универсиадага әзерлек барышында нинди дә булса проблемалар күрмим. Без Универсиада лаеклы узсын өчен барысын да эшләячәкбез”, - дип ышандырды Татарстан башлыгы.