Рөстәм Миңнеханов: “Кабельле телевидениегә бүген җитди көндәш барлыкка килде һәм ул халык өчен бушлай”

ТР Президенты Рөстәм Миңнеханов, РФ Элемтә һәм мәгълүматлаштыру министры урынбасары Алексей Малинин, “Россия телевидение һәм радио тапшырулар челтәре” компаниясе генераль директоры урынбасары Виктор Пинчукның җиңел куллары белән, бүген Татарстанда рәсми рәвештә яңа DVB-T2 форматлы цифрлы телевидение гамәлгә кертелде. Шул рәвешле, өч төймәгә берьюлы басып эшләтеп җибәрелгән бу формат, цифрлы телевидениедән тыш, өр-яңа хезмәтләргә юл ача, анда, яңа челтәр җәелдерү белән беррәтттән, гадәттән тыш хәл килеп чыккан очракта халыкны кисәтү системасын сынау зоналары да булачак.

Тантанада башлап сүз алган Президент Р.Миңнеханов, Татарстанда телевидение тарихының сәхифәләрен барлап, DVB-T2 форматлы цифрлы телевидение тапшыруларын бүгеннән үк республика халкының 40 проценты карый ала, ел ахырына 70 проценты һәм 2015 елга 100 процент, ягъни татарстанлыларның барысына да шушы мөмкинлекләрне файдалана алачак, дип куаныч белән игълан итте. Федераль Хөкүмәт карары белән тормышка ашырылган проектта катнашып, Казан Универсиадасы алдыннан заманча цифрлы телевидение булдыруда өлеше, хезмәте кергәннәргә олы рәхмәт белдергәч: “Авыл җирендәге кулланучыларга моңарчы шуннан файдалану мөмкинлеге булдыра алмаган идек. Инде кабельле телевидениегә бүген җитди көндәш барлыкка килде һәм ул халык өчен бушлай, сыйфаты буенча өстенлектә”, - дип билгеләп үтте Рөстәм Миңнеханов.

Цифрлы ТV-тапшырулар кабул итеп алучы элемтә тармагы ветераны Рәхимә Фатыйхова белән видеоэлемтәгә кереп, Татарстан башлыгы аны иң заманча технологиянең өенә керүе, ә ветеран Рөстәм Миңнехановны туган көне белән котлады.

Алексей Малинин белән Виктор Пинчук исә, бертавыштан, Татарстан Россия субъектлары арасында беренче булып яңа DVB-T2/MPEG-4 нче стандартка күчкән субъект санала, цифрлы яңа стандартка күчү сыйфади яктан сикереш булачак, дип, татарстанлыларның шатлыгын уртаклашулары хакында әйттеләр. Татарстанда федераль программа уңышлы үтәлеренә бернинди шик юк - В.Пинчук шундый фикердә. Ә инде Татарсаннан соң яңа стандартта тапшырулар илебезнең барлык төбәкләренә дә кертеләчәк.

Казандагы телевидение үзәгендә ТР Премьер-министр урынбасары-мәгълүматлаштыру һәм элемтә министры Николай Никифоров һ.б. рәсми затлар да катнашты. Кунаклар Телерадиотапшыру үзәгендә, Кодлаштыру һәм мультиплекслау, ягъни программалар формалаштыру үзәгендә, идарә кабиналарында булып, Казан телеүзәгенең тапшыргычлар залы, эфирга чыгарыла торган программалар белән танышты. Соңыннан югары җитәкчелек Консультацион ярдәм үзәгенә юл алды. Анда алар эш рәвеше һәм телерадиотапшыру үсеше музее белән танышырга ниятли.