Татарстанда капиталь ремонт инде 444 йортта бара

Бүген ТР Министрлар Кабинетында, муниципалитетлар белән берлектә видеоконференция рәвешендә, “ТКХны реформалауга ярдәм фонды турында”гы 185 нче федераль законны быел республикада тормышка ашыру һәм мәктәпләрне капиталь төзекләндерү мәсьәләләре буенча республикакүләм киңәшмә үткәрелде. Әлеге киңәшмәгә ТР Президенты Рөстәм Миңнеханов рәислек итте.

Хәзерге вакытта Татарстанның 40 муниципаль берәмлегендә 444 күп фатирлы торак йортында, ягъни 50 процентында капиталь ремонт эшләре башланган, ә Яшел Үзән районы һаман да подрядчысын сайламаган. Күрсәтелгән торак-коммуналь хезмәтләр өчен акча җыю 95,8 процент тәшкил иткән, капремонтка акча җыю да шулай ук.

Быел күп фатирлы торак йортларны капиталь ремонтлау программасын финанслау күләме Фондтан 558 млн. 878,2 мең сум, ТР бюджетыннан 1 млрд. 373 млн. 131 мең сум, муниципаль берәмлекләр бюджетыннан 1 млрд. 76 млн. 72 мең сум, милекчеләрдән 1 млрд. 348 млн. 505,9 мең сум тәшкил итә. Шул рәвешле, күп фатирлы торак йортларны капиталь төзекләндерү программасына 4 млрд. 356 млн. 587,1 мең сум китәчәк. Җәмгысе 41 муниципаль районда һәм 2 шәһәр округында шушы программа буенча 843 йорт капиталь төзекләндеререлгә тиеш, аның гомуми күләме – 5,3 млн. кв.м. ТР төзелеш, архитектура һәм торак-коммуналь хуҗалык министры Ирек Фәйзуллин чыгышында шулай дип белдерде.

Быел барлыгы 220,8 мең татарстанлының торак шартлары яхшыртыла дигән сүз, дип билгеләп үтте бу җөмләдә Президент. Торак милекчеләрен җыеп, эш күләмен аңлатырга, нәрсә эшләргә кирәклеген белешергә кирәк булачак. Ләкин капиталь төзекләндерү эшләре җылыту сезонына кадәр төгәлләнергә тиеш, эш графиклары төзелсен – таләп шундый, дип кистереп әйтте Р.Миңнеханов. Шулай ук республика башкаласында Универсиада объектлары арасындагы кунаклар йөртеләсе маршрутка туры килгән йортларның фасадларын, балконнарын ремонтлау-тәртипкә китерү буенча министр И.Фәйзуллин белән Казан шәһәре Башкарма комитеты җитәкчесе Алексей Песошинга уйлашып, шушы айда аларда эш башларга йөкләмә бирде.