8 март алдыннан Рөстәм Миңнеханов хатын-кыз журналистлар белән очрашты

Бүген Татарстан Президенты Рөстәм Миңнеханов ТР Хөкүмәте йортында язның тәүге бәйрәме - 8 Март уңаеннан хатын-кыз журналистлар белән очрашты.

Очрашу башында республика башлыгы соңгы вакытта илдә һәм республикада күп кенә вакыйгалар булып узуын, бүгенге очрашуның гаммәви мәгълүмат чаралары вәкилләре белән аралашуда яхшы мөмкинлек булуын ассызыклады.

“Мәгълүмат кырының әһәмияте арта, тиешле мәгълүмат җиткерергә сәләтле кешеләрнең роле үсә. Без сездән күп кенә файдалы һәм кирәкле мәгълүматлар алабыз”, - дип мөрәҗәгать итте республика башлыгы гүзәл затларга.

Рөстәм Миңнеханов билгеләп үткәнчә, халыкның табигый артуы – Татарстанның төп казанышларыннан берсе. Аның сүзләренә караганда, моның өчен республикада барлык шартлар да тудырыла – балалар бакчалары ачыла, мәктәпләр, торак йортлар, медицина учреждениеләре төзелә һәм ремонтлана.

“Кешеләрнең иртәгесе көнгә ышынычы булуы мөһим. Бүгенге көндә Россиядә демографик мәсьәлә бик тә кискен тора. Ил һәм Татарстан Республикасы халкы артырга тиеш”, - дип ассызыклады республика башлыгы.

Шуннан соң Татарстан Президенты журналистларның сорауларына җавап бирде. Шәхси сорауларга җавап биреп, ул хатынына 8 Мартка нәрсә бүләк итәргә икәнлеге хакында әлегә уйламавын әйтте. “Сайлау мөмкинлеге зур, хатын-кызга кирәкле әйберне табуы бик тә кыен”, - диде ул.

Сәясәт белән шөгыльләнүче гүзәл затлар хакында сөйләгәндә, Рөстәм Миңнеханов гаиләнең зур игътибар бирергә тиешле җитди эш булуын искәртте.

“Ана кеше баласы янында булырга тиеш. Без барыбыз да балаларыбызның тәрбияле, белемле булуын телибез. Эш хатын-кызларның сәясәттә кирәкле ниндидер сыйфатларга ия булмавында түгел, ә Аллаһы Тәгаләнең аларны ана итеп яралтуында, сәясәт исә чыгарга ярамый торган уен ул”, - диде Татарстан Президенты.

Ул журналистларның сайлаулар, белем бирү, сәламәтлек саклау, тарихи-мәдәни мирас, спорт, социаль челтәрләргә кагылышлы сорауларына җавап бирде.