Илдар Халиков Габалада (Әзербәйҗан) булды

Премьер-министр Илдар Халиков җитәкчелегендәге Татарстан делегациясе Әзербәйҗанга эш сәфәре барышында Габала шәһәрендә булып, биредәге консерв заводы һәм пианино фабрикасы белән танышты.

Инде хәбәр ителгәнчә, Татарстан делегациясе составында Гражданнар оборонасы һәм гадәттән тыш хәлләр министры Рәфис Хәбибуллин, РФ Дәүләт Думасы депутаты Ирек Богуславский, “Ак Барс” банкның Директорлар советы рәисе Роберт Мусин, ТР сәнәгать һәм сәүдә министрының беренче урынбасары Игорь Носов, ТР урман хуҗалыгы министрының беренче урынбасары Харис Мусин, мәгълүматлаштыру һәм элемтә министры урынбасары Анатолий Геллер бар.

Габаладагы консерв заводы яшелчә һәм җиләк-җимеш эшкәртү цехларыннан гыйбарәт. 12 гектар мәйданда сок җитештерү, компот кайнату, томат пасталары җитештерү цехлары, шулай ук җиләк-җимешне озаклап саклап тоту өчен суыту складлары урын алган. Биредә җитештерелгән соклар Әзербәйҗан территориясе белән генә чикләнеп калмыйча, башка илләргә, шул исәптән Россиягә дә экспортлана.

Илдар Халиков предприятиенең эшчәнлек дәрәҗәсен югары бәяләп, Россиядә хәзер соклар концентратлар кушып җитештерелә, ә биредә алар чын җиләк-җимештән, дип билгеләп үтте.

ТР Хөкүмәте башлыгы фикеренчә, Габаладагы консерв заводы идеологиясе буенча Казанда төзелүче агропромпаркка (җирле фермерлар җитештергән авыл хуҗалыгы продукциясен эшкәртү буенча) якын. Илдар Халиков завод җитәкчелегенә Казан май комбинатын кетчуплар җитештерү өчен томат пастасы һәм джемнар җитештерү өчен җиләк-җимеш белән тәэмин итү тәкъдимен кертте.

Икенче пункт – пианино фабрикасы булды. Габалада пианино җитештерүче Beltmann piano фабрикасының хуҗасы һәм аңа нигез салучы - Голландия мастеры Ганс Леферинк. 2002 елда аларның Голландиядәге гаилә фабрикасы ябыла. Леферинк яңа фабриканы 2008 елда Әзербәйҗанда ача. Бүген елына 1000 гә якын музыка уен коралы җитештерүче предприятиедә 135 кеше хезмәт куя. Алдагы планнар елына 3 меңгә кадәр пианино һәм рояль җитештерү белән бәйле. Моның өчен, Ганс Леферинк искәртүенчә, хезмәткәрләрнең тәҗрибә туплавы зарур.

Илдар Халиков Ганс Леферинкка предприятие буйлап экскурсия уздырганы өчен рәхмәт җиткереп, кечерәк кенә шәһәрдә шушындый югары класслы предприятиенең эшләвенә гаҗәпләнүен белдерде.

Татарстан делегациясенең бүгенге сәфәр программасында Бакуның берничә предприятиесендә булу да каралган.