Рөстәм Миңнеханов Һиндстан Республикасының Россиядәге Гадәттән тыш һәм Тулы вәкаләтле вәкиле Аджа Малһотра белән очрашты

Бүген Татарстан Президенты Рөстәм Миңнеханов Казан Кремлендә Һиндстан Республикасының Россия Федерациясендәге илчесе Аджай Малхотра белән очрашты. Республика башлыгы билгеләп үткәнчә, республика халкының Һиндстанга карата кызыксынуы көчле, бүгенге көндә ихтимал хезмәттәшлек өчен барлык юнәлешләр дә тулысынча ачылмаган әле. Р.Миңнеханов кунакларга Татарстанда 100 дән артык милләт вәкиленең дус-тату гомер кичерүе хакында хәбәр итте. “Конфессияара һәм милләтара татулык төбәккә тотрыклы үсеш кичерергә мөмкинлек бирә”, - дип ассызыклады ул, кунакларны сәламләп.

Очрашу тәмамланганнан соң, Һиндстанның Россиядәге илчесе Аджай Малхотра журналистларга кичә Казанда хезмәттәшлек турындагы меморандумга кул куелуы хакында хәбәр итте. Ул Казан федераль университетының Шәрыкне өйрәнү һәм халыкара мөнәсәбәтләр институтында Һиндстанны Өйрәнү үзәге оештыруны күздә тота. Әлеге инициатива Һиндстанның Мәскәүдәге илчелегендә дә хуплау тапты. Меморандумда шулай ук КФУга белгеч-индологны командировкага җибәрү турында килешү дә теркәлгән. Ул әлеге үзәкне җитәкләр дип көтелә. Моннан тыш, Аджай Малхотраның сүзләренә караганда, КФУ китапханәсенә Һиндстан хакындагы китаплар тапшырылачак.

Илче шулай ук Һиндстанның мәгълүмати технологияләр, фармацевтика, сәнәгать һәм химия производствосы өлкәләрендә Татарстан белән хезмәттәшлек итүгә карата кызыксыну белдерүе хакында сөйләде. “Туризмга килгәндә, без Һиндстан туристлары Мәскәүдә генә түгел, Казанда да артсын өчен барысын да эшләячәкбез”, - диде А.Малхотра.

ТР Президентының Тышкы элемтәләр департаменты директоры – Президентның халыкара мәсьәләләр буенча ярдәмчесе Искәндәр Мөфлиханов гаммәви мәгълүмат чаралары вәкилләренә белдергәнчә, Кремльдә узган очрашу уңышлы һәм нәтиҗәле булган.

“Якын киләчәктә без фармакология, сәнәгать производствосы, аерым алганда, автокомпонентлар җитештерү кебек юнәлешләрдә Һиндстан делегациясен Казанда көтеп калабыз, шулай ук IT-технологияләр һәм мәдәният өлкәсендә дә хезмәттәшлек итү күздә тотыла”, - дип хәбәр итте И.Мөфлиханов. Ул бүгенге көндә Татарстан һәм Һиндстан арасындагы хезмәттәшлекнең уңышлы мисаллары булуын билгеләп үтте.

Туризм өлкәсендә дә Һиндстан белән хезмәттәшлекне үстерү күздә тотыла. Бүген Һиндстанның Россиядәге илчесе Аджай Малхотра визит кысаларында ТР Яшьләр эшләре, спорт һәм туристлык министрлыгында булачак, анда да шул хакта сүз барачак. Аерым алганда, республика башкаласына Һиндстанның туристлык компанияләре делегациясе килер дип көтелә.

И.Мөфлиханов, Һиндстандагы “КАМАЗ Вектра Моторз Лимитед” уртак предприятиесе турындагы сорауга биргән җавабында, хезмәттәшлекнең уңышлы дәвам итүен белдерде, якын киләчәктә елына 5 мең йөк автомобиле җитештерә башлау күздә тотыла. “Бу – зур өметләр уята торган җитди планнар”, - дип ассызыклады Искәндәр Мөфлиханов.