Рөстәм Миңнеханов Түбән Камада "ТАНЕКО" ААҖ проекты буенча киңәшмә үткәрде

Кичә Татарстан Республикасы Президенты Рөстәм Миңнеханов Түбән Кама Нефть эшкәртү һәм нефть химиясе заводлары комплексында булды. Аны ТР Президенты ярдәмчесе Ринат Сабиров, “Татнефть” ААҖ генераль директоры Шәфәгать Тәхаутдинов, экология, технология һәм атом күзәтчелеге Федераль хезмәтенең Идал буе идарәсе җитәкчесе Борис Петров, Түбән Кама муниципаль районы башлыгы Айдар Метшин, төзелеш, проект оешмалары җитәкчеләре озатып йөрде. Агымдагы вәзгыять турында Президентка проектны гамәлгә ашыруда катнашучы «Нефтегазинжиниринг» ҖЧҖ, «Камгэсэнергострой» ААҖ, «Главнефтегазстройсервис» ҖЧҖ, «Татэлектромонтаж» ААҖ подряд оешмалары җитәкчеләре бәян итте.

Нефть эшкәртү заводының баш инженеры Мансур Кәлимуллин “ТАНЕКО” ААҖнең күкерт эшләп чыгару блогындагы җитештерү процессының үзенчәлекләре хакында сөйләде. “ТАНЕКО” ААҖндә гамәлгә кертелгән алдынгы технологияләр һәм заманча җиһазлар ресурслар һәм энергия, әйләнә-тирә мохитне саклау җәһәтеннән җитди нәтиҗәләргә ирешергә мөмкинлек бирә.

Экология темасы Нефть эшкәртү һәм нефть химиясе заводлары комплексының оператор бүлмәсе һәм чистарту корылмалары лабораториясендә дәвам ителде.

Сәнәгать мәйданчыгы белән танышканнан соң Рөстәм Миңнеханов “Түбән Кама Нефть эшкәртү һәм нефть химиясе заводлары комплексы” проектын гамәлгә ашыру мәсьәләләренә багышланган киңәшмә үткәрде. “ТАНЕКО” ААҖ генераль директоры Хәмзә Баһманов комплексның беренче чираты буенча доклад белән чыгыш ясады. Ул, аерым алганда, җиһазларны комплекслы төстә сынау һәм эксплуатацияләү барышында 3284 мең тонна нефть эшкәртелүе хакында бәян итте. Хәзерге вакытта ЭЛОУ-АВТ-7 җайланмасының җитештерүчәнлеге уртача 93 процентка җиткерелгән, эшкәртү тирәнлеге 93 процентка кадәр арткан. Висбрекинг җайланмасы мичләре табигый газдан комплекстка эшләп чыгарыла торган ягулык газына күчерелгән, шуның нәтиҗәсендә табигый газ куллану сизелерлек кимегән.

Түбән Кама Нефть эшкәртү һәм нефть химиясе заводлары комплексының катнаш гидрокрекинг җайланмасын сафка бастыру проектын гамәлгә ашыру идарәсе башлыгы Николай Заикин Нефть эшкәртү һәм нефть химиясе заводлары комплексының алдагы этабын гамәлгә ашыруның барышы турындагы доклад белән чыгыш ясады. Аны сафка бастыру буенча киң колачлы эшләр 2011 елда Нефть эшкәртү һәм нефть химиясе заводлары комплексының 1А1 этабы объектларындагы эшләр тәмамлану белән параллель рәвештә җәелдереләчәк.

“ТАНЕКО” ААҖнең Нефть эшкәртү һәм нефть химиясе заводлары комплексы технология процессына кертеләчәк катнаш гидрокрекинг җайланмасы елына 2,9 миллион тонна вакуум газойле эшләп чыгаруга исәпләнгән. Ул югары сыйфатлы тауар продукциясе җитештерергә мөмкинлек бирәчәк.

Киңәшмә барышында Рөстәм Миңнеханов Түбән Кама Нефть эшкәртү һәм нефть химиясе заводлары комплексы” проектын гамәлгә ашыруда катнашучыларның барысы тарафыннан да сизелерлек күләмдә эш башкарылуын билгеләп үтте. Президент белдергәнчә, “ТАНЕКО” ААҖндә кулланылучы алдынгы технологияләрне бөтен республика күләмендә һәм аннан читтәге төбәкләрдә киң җәелдерергә кирәк