Люксембургның Сәүдә палатасы директорлар шурасы әгъзасы Стив Бреер: Татарстан белән хезмәттәшлек зур үсеш потенциалына ия

Люксембург Сәүдә-сәнәгать палатасы әгъзалары Татарстан белән мөнәсәбәтләрне үстерергә һәм республика компанияләре белән танышырга тели. Бүген Татарстан-Люксембург “түгәрәк өстәл”ендә чыгыш ясаган Сәүдә палатасының Директорлар советы әгъзасы Стив Бреер шулай дип белдерә. “Түгәрәк өстәл” ТР Президенты Рөстәм Миңнеханов җитәкчелегендәге делегациянең Люксембургка эш сәфәре кысаларында оештырылды.

Стив Бреер кунакларны Люксембург Сәүдә-сәнәгать палатасының төзелү тарихы, эшчәнлеге белән таныштырды. Аннан аңлашылганча, палата Бөек Люксембург Герцоглыгы төзелгәннән соң ике ел вакыт узгач, 1841 елның октябрендә король Вильгельм II указы белән оеша. Бүген ул үз составында 50 меңгә якын әгъзаны берләштерә. Люксембург Сәүдә-сәнәгать палатасы, авыл хуҗалыгыннан тыш, бизнесның барлык секторлары белән эшләүче, дәүләт һәм шәхси компанияләр арасында арадашчы булган оешма. Ул чит илләр белән элемтәләрне үстерүгә омтыла. Стив Бреер сүзләренә караганда, әлегә Россия белән мөнәсәбәтләр тиешле нәтиҗәләр бирми. Россиянең бер төбәге булган Татарстан белән элемтәләр багланышлар үсеше өчен җитди потенциал, дип саный ул.

Бүгенге чарада катнашучыларга Татарстанның икътисади һәм инвестиция потенциалын ТР Инвестицион үсеш агентлыгы җитәкчесе Линар Якупов презентацияләде. Соңрак Татарстан делегациясе әгъзалары өчен Люксембург икътисады, компанияләре тәкъдим ителде.

Татарстан-Люксембург “түгәрәк өстәл”ендә катнашучылар төзелеш, альтернатив энергетика, автомобильләр җитештерү, дөнья финанс системасында ислам финансларын куллану һ.б. өлкәләрдә хезмәттәшлек мөмкинлекләрен карады.