Илдар Халиков Чистай районында җимерелгән күперне карады

Татарстанның Чистай районы Олы Бахта елгасы аша салынган күпернең яңасы 4 айда төзелеп бетергә тиеш, ә ул вакытка кадәр транспорт хәрәкәтен сыйфатлы әйләнгеч юлдан оештыру зарур. Бүген бу хакта Татарстан Премьер-министры Илдар Халиков гадәттән тыш вәзгыять урынында булгач белдерде.

Узган сишәмбе кичен ташу автомобиль күперен җимергән. Нәтиҗәдә 900 гә якын кеше яшәгән 3 авылның автомобиль–транспорт юлы өзелгән. Җимерелгән күпер аша хәзер җәяү генә чыгып була.

Хәзерге вакытта елгада су кимегән, җимерелгән күпер янында төзүчеләр вакытлыча дамба сала.

Бүген Татарстан Премьер-министры Илдар Халиков юлны торгызу срогы белән кызыксынды. “Бу бик мөһим, чөнки продуктлар китертергә, ашыгыч медицина ярдәме кирәк булырга мөмкин”, - дип белдерде Татарстан Хөкүмәте башлыгы.

Төзүчеләрнең сүзләренә караганда, бүген кич вакытлыча дамба буенча юл ачылачак, ә киләчәктә вакытлыча юлны ныгытачаклар. Төзелеш эшләрендә 20 техника катнаша.

Илдар Халиков җимерелгән күперне карады һәм корылманы торгызып булмаячагы белән килеште. Төзүчеләр яңа күпер төзелешен 40 млн. сум тирәсе дип бәяли.

ТР Премьер-министры барлык эшләрне дә кыска вакытта үткәрүне йөкләде һәм төзүчеләргә яңа күпер проектын ясау һәм төзү өчен 4 ай вакыт бирде.

Илдар Халиков сүзләренә караганда, бу вакыт эчендә вакытлыча әйләнгеч юл ачык булырга тиеш.

Хәзерге вакытта район һәм авыл җирлеге җитәкчеләре сүзләренә караганда, авылларны продуктлар һәм медицина ярдәме белән тәэмин итү проблемасы юк.

Республиканың Гадәттән тыш хәлләр комиссиясе карарында Татарстан плотиналарын тикшерү турындагы пункт булачак дип белдерде ТР Хөкүмәте башлыгы. Илдар Халиков билгеләп үткәнчә, гидротехник корылмаларны тикшерү бәла-каза нәтиҗәләрен бетерүгә караганда берничә тапкыр арзанга төшәчәк.