Кытайның Haier концернын “ПОЗИС” белән хезмәттәшлек кызыксындыра

Кытайның Haier концернын суыткыч техникасының яңа производствосын төзү яки гамәлдәгесен модернизацияләү өлкәсендә “ПОЗИС” ААҖ белән хезмәттәшлек кызыксындыра. Уртак проектны гамәлгә ашыру мәсьәләләре бүген ТР Хөкүмәт йортында Премьер-министр Илдар Халиковның Кытай компаниясе делегациясе белән очрашуы вакытында каралды. Очрашуда Haier Russia компаниясе генераль директоры, Россия базарын үстерү департаменты җитәкчесе, БДБ илләренең Россия базарында глобаль проектлары кураторы Сунь Чженьхуа, ТР Инвестицион үсеш агентлыгы җитәкчесе Линар Якупов, “ПОЗИС” җәмгыятенең генераль директоры Радик Хәсәнов катнашты.

“Көнкүреш техникасы җитештерү буенча дөнья лидерларының берсенең Татарстанга, “ПОЗИС” компаниясенә игътибар итүенә шатбыз”, - дип Хөкүмәт башлыгы Илдар Халиков кунакларга мөрәҗәгать итте. Ул бүгенге сәфәр уртак проектны гамәлгә ашыруда чираттагы адым булыр һәм Haier компаниясенә Россия базарында җитди урын алырга ярдәм итәр, дигән ышанычта калды.

Haier Russia компаниясе генераль директоры Сунь Чженьхуа, үз чиратында, “ПОЗИС”тан алган беренче тәэсирләре белән уртаклашты. “ Биредә яхшы әзерлекле белгечләрнең булуы безнең өчен төп плюс булды. Без шулай ук “ПОЗИС”ның бизнесны үстерүгә җитди омтылышын күрдек”, -дип белдерде ул. Сунь Чженьхуа Татарстан заводында уртак проектта да файдаланып булырлык сыйфатлы производство җиһазлары булуга игътибар юнәлтте.

Илдар Халиков җайга салынган сату челтәре булуны да “ПОЗИС”ның конкурентлык өстенлеге булуын ассызыклады. ТР Премьер-министры якын арада уртак проектның концепциясен, масштабларын билгеләргә кирәклеген искәртте. Уртак эшчәнлекнең этаплары нинди булачак, моның өчен нинди чаралар кирәк, безгә моны аңлау бик мөһим, диде ул.

Haier ның чит илләрдә эшләү тәҗрибәсен истә тотып, проектның яңа производство яки гамәлдәгенең модернизациясе булачагы хакында кайбер күзаллаулар формалаштырып булачак, дип саный Хөкүмәт башлыгы. Илдар Халиков ТР Инвестицион үсеш агентлыгына әлеге проектны әзерләү һәм реализацияләүне контрольгә алу бурычын йөкләде.

Белешмә өчен: Кытайның Haier компаниясе көнкүреш техникасы, электроника, башка төр продукция җитештерү буенча дөньяның эре компанияләренең берсе. Корпорациянең төп штаб-фатиры Циндао шәһәрендә урнашкан. Компаниянең АКШ, Ауропа, Африка һәм Якын Көнчыгышта 8 шәхси индустриаль паркы исәпләнә. Моннан тыш, дөнья илләрендә аның 20 җитештерү предприятиесе бар. 2010 елда компаниянең сәүдә әйләнеше 20,7 млрд доллар тәшкил иткән.