Рөстәм Миңнеханов иң зур халыкара реклама агентлыгы җитәкчесе белән очрашты

Бүген Казанда Татарстан Президенты Рөстәм Миңнеханов “WPP” халыкара реклама агентлыгы җитәкчесе Мартин Соррелл һәм “WPP” күзәтчелек советы әгъзасы Эстер Дайсон белән очрашты.

Очрашуда шулай ук вице-премьер – ТР мәгълүматлаштыру һәм элемтә министры Николай Никифоров, ТР Президентының Тышкы элемтәләр департаменты директоры – ТР Президенты ярдәмчесе Искәндәр Мөфлиханов, Казан мэры Илсур Метшин да катнашты
Дөньяда иң эре реклама агентлыгы“WPP” – халыкара компаниясенең 107 илдә 2400 офисы һәм 150 мең хезмәткәре бар, ә Мартин Соррелл аңа нигез салучы һәм җитәкчесе.

Рөстәм Миңнеханов Татарстан башкаласында Мартин Соррелл һәм Эстер Дайсонны сәламләде.

Татарстан Президенты республика үсеше, гамәлгә куела торган киңкүләмле проектлар хакында сөйләде. Рөстәм Миңнеханов сүзләренә караганда, чит ил инвесторларының Россиядә бизнес алып бару мөмкинлекләре һм шартлары хакында хәбәрдар булмавы Татарстанга инвестицияләр җәлеп итү проблемаларының берсе булып тора.

“Әлегә безнең илнең инвестиция җәлеп итү мөмкинлекләре начар билгеле, - диде ул. – Шулай да без үсеш алабыз, инвестицияләр өчен яхшы шартлар булдырабыз. Безнең эш Татарстанны халыкара мохиткә таныту, чит илдәге партнерларга биредәге мөмкинлекләр турында мәгълүмат бирүне таләп итә”.

Мартин Соррелл “WPP” Татарстанга халыкара мохиттә үсеш алырга ярдәм итәчәк дип белдерде. Реклама агентлыгы нефть корпорацияләре, IT-сектор компанияләре белән яхшы элемтәдә тора. М.Соррелл сүзләренә караганда, “WPP” агентлыгының спорт дөньясында күпсанлы элемтәләре бар. “Сезгә кызыклы булырлык элемтәләребез күп”, - дип мөрәҗәгать итте Рөстәм Миңнехановка Мартин Соррелл.

Моннан тыш,“WPP” җитәкчесе сүзләренә караганда, компания Татарстанны инвестиция җәлеп итүчән төбәк буларак таныту белән шөгыльләнергә әзер.

Татарстан Президенты Рөстәм Миңнеханов М.Сорреллның хезмәттәшлек итү турындагы тәкъдимен хуплады. “Сезне партнерларыбыз буларак күрергә телибез”, - дип мөрәҗәгать итте республика башлыгы “WPP” җитәкчесенә.