Рөстәм Миңнеханов: “Шнейдер Электрик” белән хезмәттәшлекнең яңа стратегик юнәлешләрен билгеләргә кирәк

Бүген “Шнейдер Электрик” компаниясе белән Казан дәүләт энергетика университеты арасында белем бирү хезмәтләрен күрсәтү хакындагы килешүгә кул куелды. Документны “Шнейдер Электрик”ның Россиядәге һәм БДБ илләрендәге генераль директоры урынбасары Валерий Саженков белән КДЭУ ректоры вазифаларын башкаручы Эдвард Абдуллаҗанов имзалады. Килешүгә ТР Хөкүмәт йортында Татарстан Президенты Рөстәм Миңнеханов, “Шнейдер Электрик”ның Күзәтүчеләр советы президенты Анри Лакманн, компаниянең Россиядә һәм БДБ илләрендәге президенты Жан-Луи Стази катнашында кул куелды.

Аңа кадәр Рөстәм Миңнеханов белән Анри Лакманн Татарстан белән “Шнейдер Электрик” арасында энергетика өлкәсендә, компания продукциясен республика һәм башка төбәкләр базарына чыгару буенча алга таба хезмәттәшлек перспективалары хакында фикерләште.

Билгеле булганча, бүген Татарстан территориясендә сәнәгать өчен электротехник һәм электрон җиһазлар җитештерүче “Шнейдер Эленктрик” компаниясе эшләп килә. Компания республиканың югары уку йортлары, аерым алганда, Казан дәүләт энергетика университеты белән элемтәләрен киңәйтә. Татарстан Президенты Анри Лакманн белән бүгенге очрашуда “Шнейдер Электрик” белән республика арасында хезмәттәшлекнең яңа стратегик юнәлешләрен билгеләргә кирәк дип белдерде. Ул “Шнейдер Электрик” продукциясен алга таба этәрүдә бигрәк тә ресурслар һәм энергия саклау өлкәсендә комплекслы чишелешләр тәкъдим итү кирәклеген искәртте.