Рөстәм Миңнеханов EF English First белем бирү программалары директоры Кристофер Мак Кормик белән очрашты

Бүген Хөкүмәт йортында ТР Президенты Рөстәм Миңнеханов Кембридж университеты белән хезмәттәшлек буенча департамент башлыгы, EF English First белем бирү программалары директоры Кристофер МакКормик белән очрашты. Очрашуда шулай ук ТР мәгариф һәм фән министры Альберт Гыйльметдинов, ТР Президентының Тышкы элемтәләр департаменты директоры – Президентның халыкара мәсьәләләр буенча ярдәмчесе Искәндәр Мөфлиханов катнашты. Яклар мәгариф өлкәсендә алга таба хезмәттәшлек мәсьәләләрен күтәрде.

Рөстәм Миңнеханов EF English First эшчәнлегенең республикада зур сорау табуын искәртеп, чит телләрне өйрәнүнең өстенлекле юнәлешләрнең берсе булуын, бигрәк тә яшьләр, студентлар, мәктәп укучылары өчен мөһим икәнен ассызыклады.

Узган елның октябрендә EF English First компаниясе белән ТР Мәгариф һәм фән министрлыгы арасында килешү имзаланган иде. Аның кысаларында укытучыларына, министрлык-ведомство җитәкчеләренә, волонтерлар, студентлар һәм укучыларга инглиз телен өйрәтү буенча масштаблы белем бирү программасын гамәлгә ашыру башланган иде.