ТР Президенты Питрәч, Балык Бистәсе һәм Теләче районнарында булды

Бүген Татарстан Президенты Рөстәм Миңнеханов ТР Питрәч, Балык Бистәсе һәм Теләче муниципаль районнарында булды. Питрәч районында Президент язгы кыр эшләре барышы белән танышты. Республика башлыгы “Ак Барс – Питрәч” агрофирмасы кырларын караганнан соң авыл хуҗалыгы предприятиеләре җитәкчеләре һәм район җирлекләре башлыклары белән аралашты. ТР Президенты чәчү эшләре барышы һәм бүген аграрийларны борчыган проблемалар белән кызыксынды. Аерым алаганда, республика башлыгына авыл хуҗалыгы җитештерүчеләре өчен үз продукцияләрен сату мөмкинлекләрен киңәйтү буенча сорау бирелде. Р.Миңнеханов бу максаттан хәзер Казанда агропромпарк төзелеше бара дип искәртте. Комплекс тулысынча дәүләтнеке булачак, бу авыл хуҗалыгы җитештерүчеләренә үз продукциясен арадашчыдан башка сату мөмкинлеге бирәчәк, чөнки сәүдә урыннарын билгеләүне республиканың Авыл хуҗалыгы һәм азык-төлек министрлыгы катгый контрольдә тотачак.

Очрашуда аграрийлар авыл хуҗалыгы продукциясен, аерым алаганда, бәрәңгене эшкәртү күләмен арттыру зарур булуына игътибарны юнәлтте. ТР авыл хуҗалыгы һәм азык-төлек министры Марат Әхмәтов узган ел “Татплодовощпром” саклаган 3 мең тонна бәрәңге ихтыяҗ булмау сәбәпле, әле дә сатылмаган дип борчылуын белдерде. М.Әхмәтов сүзләренә караганда, хәзер министрлык тарафыннан Израильнең бер компаниясе белән Татарстанда бәрәңге эшкәртү буенча предприятие булдыру мөмкинекләрен ачыклау уңаеннан сөйләшүләр алып барыла. ТР Президенты республикада авыл хуҗалыгы культураларын, барыннан а элек ашлык һәм бәрәңгене эшкәртү проектларын гамәлгә куюның әһәмиятлелеген ассызыклады. Бу агросәнәгать комплексына артык авыл хуҗалыгы продукциясен сату проблемасын хәл итү мөмкинлеге бирер иде.

ТР Президенты кырларны карагач, Питрәч авылына юнәлде, анда 2 нче урта мәктәптә капиталь ремонт барышы белән танышты. Биредә ремонттан тыш, төп бинага янкорылма да төзелә. Хәзер мәктәптә 440тан артык укучы белем ала. Өстәмә комплекс төзү бер сменада укыту мөмкинлеге бирәчәк. Объектны финанслау күләме 85 млн. сум тәшкил итә.

Районда республика программасы буенча 3 мәктәптә капиталь ремонт бара, аларның икесе район үзәгендә урнашкан, бер башлангыч мәктәп – Шәле авылында.

Шулай ук республика Президенты Балык Бистәсе һәм Теләче муниципаль районнарында язгы кыр эшләре барышы белән танышты.