Рөстәм Миңнеханов: "Авылга ярдәм кимемәячәк"

ТР Президенты Биектау, Арча, Балтач, Кукмара һәм Саба районнарында язгы кыр эшләренең барышы белән танышты. Рөстәм Миңнеханов чәчү эшләре башкарылган кырларны карады, авыл хуҗалыгы предприятиеләре җитәкчеләре һәм авыл җирлекләре башлыклары белән очрашты.

Кукмара районында республика башлыгы Фәнис Хәсәновның 50 баш сөт терлегенә исәпләнгән гаилә фермасында булды, Карадуган мәктәбендә капитаь төзекләндерү эшләренең барышы белән танышты.

Саба районында Президент Наил Шәйхуллинның сарык үрчетү буенча махсуслашкан гаилә фермасын карады. Соңрак журналистлар белән әңгәмә вакытында Рөстәм Миңнеханов язгы чәчүнең барышыннан канәгать булуын җиткерде, быел республика Хөкүмәте тарафыннан аграрийларга каралган ярдәм чаралары хакында сөйләде. Аның ассызыклавынча, быел ярдәм ким булмаячак. “Быел федераль бюджеттан да, республика бюджетыннан да финанслар бүлеп бирелә. Хәзер җәйге чорда сөт бәясе белән бәйле күп сораулар туа. Бу уңайдан ниндидер субсидияне гамәлгә кертергә уйлыйбыз. Бу хакта халык та, авыл хуҗалыгы берләшмәләре дә сорый. Сөт күп, ә аннан табыш аз алына”, - диде ул. Җәй айларында сөт җитештерүчеләрне субсидияләүнең Хөкүмәт төрле формаларын карый. ТР Премьер-министры урынбасары-авыл хуҗалыгы һәм азык-төлек министры Марат Әхмәтов журналистларга белдергәнчә, бу мәсьәлә килештерелгән, якын көннәрдә ул ТР Президенты тарафыннан конкрет чишелеш табачак. “Сөтне сатып алу бәяләре түбән булган җирдә якындагы 4 айда субсидияләү режимы кертеләчәк. Хисаплау методикасын уйлыйбыз. Бер литр сөткә 2 шәр сум дотация туры килергә тиеш”, -дип җиткерде М.Әхмәтов.

Журналистлар белән әңгәмә вакытында Президент Рөстәм Миңнеханов авыл хуҗалыгы продукциясен сату мәсьәләсенә дә кагылды. “Агросәнәгать базарларына зур өметләр баглыбыз. Чистайда, Чаллыда шундый тәҗрибә бар инде. Казанда да зур масштаблы базар булачак. Бүген авыл хуҗалыгы җитештерүчесе товарын базарга этәрү чикләнгән. Ул эшкәртүчегә, кибеткә бәйле. Агросәнәгать базарында җитештерүче үз товарын турыдан-туры реализацияли алачак”, -дип билгеләп үтте республика башлыгы.

Президент фикеренчә, авыл хуҗалыгы продукциясен реализацияләүне арттыруда кулланучының мәгълүматлы булуы да мөһим роль уйный. “Кулланучыга нинди сыйфаттагы продукцияне куллануларын, ашау һәм эчүләре турында аңлатырга тиешбез. Кешеләр сәламәтлекнең туклана торган продуктларның сыйфатына бәйле икәнен аңларга тиеш. Туклану культурасы – кешеләр сәламәтлеге”, - ди Рөстәм Миңнеханов.