ТР Президенты Казансу елгасы ярларында төзелеш эшләре барышы белән танышты

Казансу елгасының ярларын үстерү перспективалары турында Татарстан Президенты Рөстәм Миннеханов үткәргән күчмә утырышта сөйләшенде. Республика башлыгы Казан мэры Илсур Метшин һәм республиканың Төзелеш, архитектура һәм торак-коммуналь хуҗалык министры Ирек Фәйзуллин белән Казансу елгасының сул як ярындагы Кремль янында урнашкан төзелеш мәйданчыгында, Универсиада медиа-үзәгенең төзелеш мәйданчыгында һәм төзелә торган Су спорты төрләре сараенда булды.

Республика Президентына бер төркем объектларны, шул исәптән, Сәнгать сараен, машина кую урыннарын, велосипед юлларын һәм причаллар төзүне күз уңында тоткан Казансу елгасының сул як ярын үстерү концепциясе тәкъдим ителде.

Рөстәм Миннеханов 2013 елгы Универсиадага яр буйларын төзекләндерү эшенең төп мәсьәлә булуын билгеләде. Татарстан башлыгы җаваплы түрәләргә барлык кирәкле документларны алу белән шөгыльләнергә һәм хәзерге вакытта туктатылган терәк диварларны урнаштыру һәм ком салу эшләренә тиз арада тотынырга кушты.

Универсиаданың медиа-үзәге Казансуның уң ярында Нәшрият белән янәшә урнашачак. Рөстәм Миннеханов төзелеш мәйданчыгында булганда эшнең барышы белән танышты, төзелеш эшләрен тизләтү өчен йөкләмәләр бирде.

Су спорты төрләре сарае һәм 45 мең урынны үз эченә алган футбол стадионы проектында шулай ук ярны төзекләндерү каралган. Аерым алганда, Универсиада вакытында комлы пляжда пляж валейболы буенча ярышлар үткәреләчәк. Кичә республика башлыгы яр буе һәм спорт корылмасы төзелеше барышы белән танышты.