Рөстәм Миңнеханов: Казандагы Универсиада лаеклы дәрәҗәдә узачак

Бүген Казанның “Корстон” кунакханә-сәүдә-күңел ачу комплексында Халыкара студентлар спорты федерациясе (FISU) Башкарма комитеты утырышы узды. Аның эшендә Татарстан Президенты Рөстәм Миңнеханов, FISU Президенты Клод-Луи Гальен, Халыкара студентлар спорты федерациясенең беренче вице-президенты, Россия студентлар спорты берлеге президенты Олег Матыцин, FISU Генераль секретаре Эрик Сайнтронд, ТР Яшьләр эшләре, спорт һәм туризм министры Рафис Борһанов, “Казанда 2013 нче елгы XXVII Бөтендөнья Җәйге Универсиада Башкарма дирекциясе” АНО генераль директоры Владимир Леонов, җәйге һәм кышкы Универсиада директорлары, FISU Башкарма комитеты әгъзалары, милли студент спорт берлекләре рәисләре катнашты.

Рөстәм Миңнеханов сәламләү чыгышында FISU Башкарма комитеты әгъзаларын кабул итүнең безнең өчен зур горурлык булуын шәрехләп үтте. “Сез безгә бик якын, без үзебезне FISU гаиләсе әгъзалары итеп тоя башладык инде”, - дип билгеләп үтте Президент. Ул ассызыклап үткәнчә, Казанда 2013 нче елгы җәйге Универсиадага әзерлек эшләре FISU таләпләренә буйсынып алып барыла. “Әзерлек процессының төп казанышларының берсе чит ил спортчылары һәм рәсми делегацияләр өчен визасыз керү режимын булдырудан гыйбарәт. Россия Президенты Указы 2012 нче елның 30 мартында имзаланды”, - дип белдерде Рөстәм Миңнеханов. Әлеге документ нигезендә, илгә керү өчен “Казан 2013” Башкарма дирекциясе бирәчәк шәхси аккредитация таныклыклары һәм гамәлдәге паспорт хезмәт итәчәк. Визасыз режим 2013 нче елның 25 июненнән 25 нче июленә кадәр үз көчендә булачак.

Утырыш кысаларында якын елларда көтеләчәк Бөтендөнья студентларының спорт уеннарын оештыру комитетлары докладлары тыңланды. Әзерлек турында Италиядә (Трентино) 2013 нче елның кышында узачак Универсиаданы, 2015 нче елда Кореянең Кванджу шәһәре кабул итәчәк җәйге Универсиаданы, 2015 нче елда Гранадада (Испания) булачак кышкы Универсиаданы, 2017 нче елда Алматада (Казакъстан) көтеләчәк кышкыУниверсиаданы оештыру комитеты вәкилләре сөйләде. Моннан тыш, утырыш эшендә 2011 нче елда Кытайның Шеньчжэнь шәһәрендә узган җәйге Универсиаданы оештыру комитеты әгъзалары уеннарга әзерлек һәм аларны уздыру турындагы йомгаклау доклады белән хисап тота.

Бүген көндезге 14 сәгатьтә 2013 нче елгы җәйге Универсиада хуҗабикәсе буларак Казанда башкарылучы әзерлек эшләре турында хисап тыңланачак.

Казанга эш сәфәре кысаларында FISU Башкарма комитеты әгъзаларының Красноярски крае губернаторы Лев Кузнецов белән очрашуы көтелә. Искәртеп үтәбез, Красноярск 2019 нчы елда Бөтендөнья кышкы Универсиада хуҗабикәсе булуга дәгъва кыла.