Татарстан Президенты Универсиада маршрутларында тышкы уңайлыклар булдыру проектлары белән танышты

Татарстан Президенты Рөстәм Миңнеханов 2013 елгы Бөтендөнья җәйге универсиада маршрутларына кертелгән ураманар буйлап йөреп чыкты. Республика башлыгы белән бергә Казан мэры Илсур Метшин, ТР төзелеш, архитектура һәм торак-коммуналь хуҗалык министры Ирек Фәйзуллин, ТР транспорт һәм юл хуҗалыгы министры Ленар Сафин, шәһәр Башкарма комитеты җитәкчесе Алексей Песошин булды.

Татарстан Президентына Универсиада маршрутлары буенча тышкы уңайлыклар булдыру проектлары тәкъдим ителде. Шулай, аерым алганда, йортларның фасадларын яңарту, җәяүлеләр йөрү зоналарын яхшырту көтелә. Рөстәм Миңнеханов сүзләренә караганда, үзәк урамнарда асфальт катламын тулысынча яңартырга кирәк.

Фехтование буенча РСДЮСШОРда булганда Р.Миңнеханов Студентлар уеннары спорт объектларына алып бара торган юлларны төзекләндерергә кирәклеген ассызыклады.

Республика башлыгы Воровский урамында төзелә торган тимер юл вокзалында булды. Ул вокзал бинасын, җир асты юлын һәм тимер юл платформаларын төзү барышы белән танышты, вокзал яны территориясендә уңайлыклар булдырырга кушты. “Пассажир вокзалдан бернинди тоткарлыксыз җәмәгать транспорты тукалышына чыгарга тиеш, - дип искәртте Р.Миңнеханов. – Без монда хәрәкәт ачабыз икән, пассажирларга шартлар тудырырга кирәк”.

Аның сүзләренә караганда, вокзал янындагы торак йортларның фасадларын шулай ук тәртипкә китерергә кирәк.

Республика башлыгы “Тасма” стадионында җиңел атлетика манежының җылыту системасын һәм түбәсен төзекләндерергә акча бүлеп бирергә сүз бирде – хәзер аннан башка манежны файдаланып булмый.

Шул ук вакытта, Р.Миңнеханов билгеләп үткәнчә, шәһәр һәм район җитәкчелегенә иганәчеләрне җәлеп итү эше белән активрак шөгыльләнергә кирәк, алар Казан шәһәренең Мәскәү районында урнашкан массакүләм спортның мөһим объектларының берсен реконструкцияләү эшендә ярдәм итә алырлар иде.

Павлюхин һәм Эсперанто урамнары киселешендә тукталган вакытта Рөстәм Миңнехановка Эсперанто урамы буйлап урнашкан авария хәлендәге алты йортның яшәүчеләре, кайчан алар яңа йортка күчәчәк, дигән сорау белән мөрәҗәгать иттеләр.

Татарстан Президенты, хәзерге вакытта шәһәр һәм республика җитәкчелеге, йортлар Универсиада маршрутына туры килгәнгә, төрле күчерү вариантларын карый, дип хәбәр итте.

Маршрутлар буйлап йөрүнең ахырында Рөстәм Миңнеханов Халыкара ат спорты комплексында урнашкан спорт манежының төзелеш мәйданчыгындә булды.