Татарстан Президенты Рөстәм Миңнеханов Казандагы ТР Язучылар берлеге бинасын карады

Татарстан Язучылар берлеге урнашкан бина үзгәртеп корылып, бүген иртән ул ишекләрен ачты, без дә карап чыктык, диде “Казан” милли мәдәният үзәгендә уздырыла торганТатарстан Язучылар берлегенең XVII корылтаенда ТР Президенты Рөстәм Миңнеханов. Бина әдипләрнең иҗади эшчәнлегенә күбрәк мөмкинлекләр бирер, эшенә уңай тәэсир итәр, чөнки Язучылар йорты заманча җиһазлар белән баетылды, диде республика башлыгы.

Милли телне, гореф-гадәтләрне саклау, әхлакый һәм рухи кыйммәтләр теләсә кайсы чор җәмгыятенең төп кыйбласы булып калырга тиеш, ә әдәбият һәм язучыларның монда өлеше гаять зур. Мәгълүмати җәмгыятьтә язучы сүзенә элеккегечә ихтыяҗ бар, мәгълүматның сыйфади ягы һәм эчтәлеге тиешле дәрәҗәдә булырга тиеш, заманча технологияләр исә Татарстан, татар әдәбиятын дөньякүләм киңлектәге мәйданга чыгарырга сәләтле – ТР Президенты шундый фикердә.

Язучы аерым критерийларга туры килергә тиеш, дип, Р.Миңнеханов андый кеше буларак күптән түгел дөньялыктан киткән Туфан ага Миңнуллинны атады: андый шәхесләр үзенә күрә нигезташ тәшкил итә һәм аларга тигезләнү кирәк, диде. Татарстан җитәкчелеге үз ягыннан берлек алдында биргән төп вәгъдәләрен үти, үтәргә тырыша, ләкин язучыларга авторлык гонорарлары билгеләү методологиясен, түләү механизмын яңадан әзерләргә кирәк, шул исәптән электрон басмаларда хезмәтләре дөнья күрә торганнар да игътибардан калмаска тиеш. Республиканың электрон китап проекты, Татарстан китап фонды, “тере” китапларда әсәрләрнең электрон формада чыгуы исә әдәбиятыбызны танытуда этәргеч булып тора, чыгымнары да күпкә ким, электрон версиядә әсәрләр укучыга да тиз барып җитә... Әдәби әсәрләрне башка телләргә тәрҗемә итү системалы булырга тиеш, республикага күп итеп кунаклар килә, Татарстан һәм татар халкы турында тарихка караган язмалар бар, ләкин әсәрләрне ничек итеп җиткерергә – монысы мәсьәлә, гомумән, эшне уңай якка үзгәртергә кирәк, дип басым ясап әйтте Президент.

Болардан тыш, эшләнә торган “Татар иле” сайты белән гамәлдәге “ТНВ” телеканалы Татарстанда чыккан басмаларны пропагандаласын, укучысына мәгълүмат биреп, китаплар белән даими таныштырып барсын, әдәби иҗатның абруен күтәрерлек итеп эшләсен. Әдәби тәнкыйтьчеләр дә, үз чиратында, укучыга теге яки бу басманың отышлыларын тәкъдим итсен, диде ул.

Язучылар берлекләре арасында халыкара, илкүләм планда багланышлар булырга тиеш дип саныйм, ләкин аның нинди формада буласын язучылар үзләре уйлашсын. Тагын Россия Федерациясе грантларына конкурсларда катнашу зарур, шулай ук Татарстан грантларын да гамәлгә кертик – тәкъдимнәр әзерләгез, дип мөрәҗәгать итте Татарстан Илбашы Рөстәм Миңнеханов каләм-сүз осталары алдында чыгышында. Гомумән алганда, Татарстан Язучылары берлегенең эшчәнлеген тотрыклы дип саныйм, дип канәгатьлек белдерде ул. Соңгы сүз итеп, барлык язучыларга ихлас рәхмәт сүзләре әйтте һәм иҗатларында уңышлар теләде.