2013 елның җәенә Казанда Универсиадада кулланылачак урамнарда төзелгән йортларның фасадларын тәртипкә китерәчәкләр

Казан шәһәренең урам-юл челтәрен Универсиадага әзерләү программасының гомуми күләме 39 млрд сум тәшкил итә. Ул үз эченә юлъаергычлар, җәяүлеләр өчен җир асты һәм җир өсте кичүләре төзелешен, гамәлдәге юлларны ремонтлауны, трамвай юллларын реконструкцияләүне, башкаладагы автомобиль юллары төзелешен, ремонтлау һәм реконструкциясен ала. Бүгенге көндә әлеге программа буенча якынча 17 млрд сумлык эшләр башкарылган. Быел әлеге программа буенча урам-юл челтәре төзелеше, ремонт һәм реконструкциясе өчен якынча 12 млрд сум үзләштереләчәк. Шуның 8 млрд сумы тулысы белән юл эшләренә генә тотылачак. Аның 6 млрд сумы Универсиадага әзерлек кысаларында бүлеп бирелгән, 2 млрд сумы республика казнасыннан бүленгән. Бу хакта бүген Хөкүмәт йортында узган брифингта Казан шәһәре муниципаль берәмлеге башлыгының беренче урынбасары Иршат Минкин сөйләде.

Аның сүзләренә караганда, 5 юлъаергыч буенча бүген сынау рәвешендә транспорт хәрәкәте оештырылган, алар рәсми рәвештә файдалануга тапшырылачак. Июнь ахырына тагын 2 юлъаергычта сынау рәвешендә хәрәкәт ачылачак. Шуларның берсе Җиңү Проспекты-Зорге юнәлешендә борылып китү өчен төзелгән участоклар.

Бу сезонда Татарстан башкаласындагы урам-юл челтәренең 10,5 процентында төзү, төзекләндерү һәм реконструкция эшләре алып барылачак. Моңа кадәр Казан юлларында мондый масштаблы эшләр башкарылмаган. Ремонтланачак юлларның гомуми озынлыгы 123 км һәм мәйданы 2,2 млн кв м тәшкил итә. Төзекләндерүгә 74 урам эләгәчәк. Бу исемлектә, беренче чиратта, Универсиада маршрутларына кергән урамнар урын алган. Шул ук вакытта программаны төзегәндә шәһәр халкының теләкләре һәм юлларның хакыйкатьтәге торышы да исәпкә алынган. Мәсәлән, баштарак Тукай урамы планда каралмаган булса, соңрак шәһәрлеләр тәкъдиме белән урамны капиталь төзекләндерүгә 175 млн сум бүленгән.

Иршат Минкин ассызыклаганча, Универсиадага Казан шәһәренең урам-юл челтәрен әзерләү программасында төп урынны Зур Казан Боҗрасын реконструкцияләү алып тора. Сәет-Галиев урамыннан Декабристлар урамына кадәр аралыкта элек төзелгән участокны да исәпкә алып, Боҗраның гомуми озынлыгы 26,9 км га җитәчәк. Быел Мамадыш тракты һәм Подлужная урамында реконструкция эшләре тулысынча тәмамланачак. Копылов һәм Тэцевская урамнарында эш дәвам итәчәк. Реконструкция эшләре быел 31,4 км юлда алып барылачак. Ә яңа салыначак юлларның гомуми озынлыгы 9,6 км булачак. Аерым алганда, С.Хәким урамында ике участокны төзеп бетерү ниятләнә. Шуннан соң әлеге урам Ленин дамбасын Миллениум күпере белән тоташтырачак. Өстәмә юл С. Хәким урамын Әмирхан проспекты белән дә бәйләячәк.

59 урамда гомуми озынлыгы 81,8 км булган юлларның өслекләрен яңартырга кирәк булачак. Юл эшләренә 1500 кеше җәлеп ителгән. Юл эшләренең төп өлеше җәй айларына туры киләчәк. Шушы кызу эш чорында Иршат Минкин хәрәкәтне чикләү графикларының бик уйлап, икенче юлдан узу мөмкинлеген исәпкә алып эшләнүен җиткерде. Юлларның сыйфаты аерым контрольдә. Төзелеш-төзекләндерү эшләренең сыйфатын заказчы булган Дәүләт төзелеш күзәтчелеге идарәсе, Казан шәһәренең капиталь төзелеш һәм реконструкция идарәсе дә, проектлаучы- Татдорпроект институты да контрольдә тотачак.