ТР Президенты "ICL-КПО ВС" сәнәгать электроникасы заводы нигезенә хат белән капсула салды

Бүген Татарстан Президенты ТР Лаеш районы Усад авылында сәнәгать электроникасы җитештерә торган «ICL-КПО ВС» заводының фундамент нигезенә киләчәк буынга атап хат белән капсула салды. Предприятие компьютер техникасын: шәхси компьютерлар, ноутбуклар, серверлар һәм башкаларны, сәнәгать электроникасын да - чыгару һәм җитештерү белән шөгыльләнәчәк.

Предприятиенең бер ел эчендә гомуми җитештерү көче 1 миллион техника эшләп чыгаруны тәшкил итәчәк.

Татарстан Президенты Рөстәм Миңнеханов сүзләренә караганда, «ICL-КПО ВС» заводы инде күптән җирле, локаль Татарстан предприятиесе булудан туктады һәм сизелерлек җитештерү көченә, экономик күрсәткечләргә иреште.

“Бүген без - илнең ИТ-тармагы үсеше өлкәсендә тарихи вакыйга шаһитләре. Компания коллективы бурычлары күпкә амбициоз. Бу - ИТ-белгечләрне укыту, үз программа продуктларын алга җибәрү генә түгел, ә компьютер техникасын һәм сәнәгать электроникасын җитештерү көчен үстерү. Яңа заводны төзү – бөтен ил өчен үрнәк. Владимир Путин ил алдында югары квалификацияле эш урыннарын булдыру бурычын куйды, һәм яңа заводка нигез салу – аның йөкләмәсен үтәү. Әгәр дә завод булмаса, иң яхшы кадрлар илдән китәрләр иде”, - диде ул.

Татарстан Президенты чара кунакларының игътибарын завод территориясе янында ИТ-авылның бер өлеше төзелгәненә юнәлтте, анда яңа өйгә күчеп килгәннәр - «ICL-КПО ВС» компаниясе хезмәткәрләре яши. Хәзер алар Казандагы җитештерү сәнәгатендә эшлиләр. Әлбәттә, бу авылда яшәүчеләрнең бер өлеше яңа заводта да эшләячәк.

Рөстәм Миңнеханов республика җитәкчелеге проектка һәрьяклап ярдәм итәчәгенә ышандырды һәм планнарның тиз арада тормышка ашуын теләде.

Завод күпбрендлы җитештерү сәнәгате буларак төзелә. Продукция компаниянең үз «ICL» һәм «RAY»брендлары астында да, «Fujitsu Technology Solutions» заказы буенча «Fujitsu» бренды астында чыгарылачак.

Монда башка дөньякүләм һәм илебез компанияләре дә заказларын урнаштыруы мөмкин.

Заводны төзү 3 этаптан тора. Төзелеш эшләре беткәч, 8 гектар җирдә 3 җитештерү комплексы һәм 2 инженерия үзәге сафка басачак. Беренче этапны башкару тулаем алганда 600 миллион сумны тәшкил итә.

Бүген завод территориясендә төзелеш эшләренә инде тотындылар. Беренче этапны 2013 елның беренче кварталында башкарып чыгу планлаштырыла.

Завод тулысынча 2017 елда эшли башлаячак.

“Заводны эшләтеп җибәрү сизелерлек дәрәҗәдә җитештерүне киңәйтеп җибәрергә мөмкинлек бирәчәк. Инде бүген «ICL-КПО ВС» Россиянең иң эре компьютер техникасын җитештерүчеләре өчлегенә керә, ләкин бу безнең мөмкинлекләребезнең чиге түгел”, - ди «ICL-КПО ВС» ААҖ генераль директоры Виктор Дьячков.

Аның сүзләренә караганда, инде берничә унъеллык элек ЭВМ Казан заводы илебез компьютер сәнәгате флагманы иде.

Заводны төзү Казанга Россиянең компьютер башкаласы статусын кайтарырга ярдәм итәчәк.

Виктор Дьячков киләчәк буынга дип язылган хатны укыды, анда 24 май көнне Татарстанда ИТ-тармагы үсешенең яңа чоры башлануына этәргеч була алырлык тарихи вакыйга булды, һәм заводның хәзерге хезмәткәрләре ЭВМ Казан заводы, «ICL» Британия һәм «Fujitsu» Япония компанияләре нигез салган традицияләрне киләчәк буын саклый, арттыра алуында ышана диелә.

Исегезгә төшерик, «ICL-КПО ВС» - югары технологияле компания, ул илнең эре ИТ-предприятиеләре исемлегенә керә. Эшчәнлегенең төп юнәлешләренең берсе – программа белән тәэмин итүне эшләү, консалтинг хезмәтләрен күрсәтү, системалы интеграция һәм копьютер техникасын җитештерү. Предприятие “Fujitsu” Япония корпорациясе белән бергә эшли.

2011 елда компания 1,3 миллиард сумлык 65 мең берәмлек үз продукциясен җитештергән. Быел 70 мең берәмлек продукция ясарга, ә 2014 елда бу күрсәткечләрне 100 мең берәмлеккә кадәр арттырырга планлаштырыла.