Төркиянең чит ил эшләре министры: "Төркия белән Татарстанның дуслык мөнәсәбәтләрен үстерүгә чикләр юк"

Бүген Татарстан Республикасы Президенты Рөстәм Миңнеханов Төркия республикасына сәфәре кысаларында Төркия тышкы эшләр министры Әхмәт Давыдуглы белән очрашты. Әнкарада Төркиянең тышкы сәясәт ведомствосы резиденциясендә узган эшлекле төшке аштан соң ТР Президенты белән Төркия тышкы эшләр министры журналистлар алдында чыгыш ясады. Рөстәм Миңнехановның Әнкарага килүе Төркия ММЧ вәкилләрендә зур кызыксыну уятты. ТР Президенты белән Төркия тышкы эшләр министрының чыгышын төрле телеканаллардан уннан артык телевизион камера төшерде.

“Безнең илдә Татарсан Президентын каршы алу зур шатлык”, - дип билгеләп үтте Төркия тышкы эшләр министры. Ул Татарстан белән Төркия мөнәсәбәтләре актив үсеш ала дип ассызыклады. “Безнең өчен дуслык мөнәсәбәтләрен үстерүгә чикләр юк”, - диде министр.

“Кызганычка каршы, икътисади кризис нәтиҗәсендә Төркия белән Татарстан арасында тауар әйләнеше 800 млн. долларга кимеде, ә элек 3 млрд. доллар тәшкил иткән иде. Иртәгә Истанбулда Татарстан Президенты катнашында эшлекле форум уза. Бу безнең илләр арасындагы сәүдә-икътисади мөнәсәбәтләрне торгызу һәм киңәйтү өчен яңа этәргеч булыр дип өметләнәм”, - диде Әхмәт Давыдуглы.

Министр Татарстан-Төркия мөнәсәбәтләрендә тарихи-мәдәни аспект аерым мәгънәгә ия дип белдерде. “Казанда уртак мәдәни мирасның күп кенә әһәмияткә ия элементлары бар”, - диде Төркия тышкы эшләр министры. Моннан тыш ул 21 июньдә Татарстанга сәфәр кысаларына Казан Сабантуенда катнашырга планлаштыра. Әхмәт Давыдуглы чыгышын тәмамлагач Рөстәм Миңнехановка Төркиягә визиты өчен рәхмәт әйтте һәм киләчәктә Төркия белән ТР арасында элемтәләрне киңәйтүгә ышаныч белдерде.

Татарстан Президенты Әхмәт Давыдуглы җиткчелегендәге Төркия тышкы эшләр министрлыгына Төркиянең Россиядәге илчелеге белән бергә бу сәфәрне оештырулары өчен рәхмәт белдерде. “Төркия Республикасы җитәкчелегенә барлык төрки телле милләтләрнең тарихын, телен, мәдәниятен, динен саклаулауга мөнәсәбәте өчен рәхмәт белдерәсем килә”, - диде Рөстәм Миңнеханов. Аның фикеренә караганда, узган ел Төркиядә Тукай елын уздыру моның ачык мисалы булып тора.

Сәүдә-икътисади элемтәләрне киңәйтүгә һәм сәүдә әйләнешен арттыруга килгәндә, бу вәзгыятьне уңай хәл итү өчен күп көч куярга кирәк, дип билгеләп үтте ТР Президенты. Бу максатка ирешергә Истанбулда узачак Татарстан-Төркия инвестиция форумын үткәрү мөмкинлек бирергә тиеш.

Рөстәм Миңнеханов билгеләп үткәнчә, 2009 елда Төркия Президентының һәм 2011 елда бу ил Премьер-министрының Татарстанга визиты ике яклы мөнәсәбәтләргә барлык юнәлешләр буенча да этәргеч бирде. “ТРның 70тән артык предприятиесе Төркия республикасы белән актив элемтәдә тора, Татарстанда 380нән артык фирма Төркия капиталы белән эшли”, - дип билгеләп үтте республика башлыгы. Ул Төркия компанияләре тарафыннан “Алабуга” МИЗда гамәлгә куела торган 3 проектны билгеләп үтте. “Кастамону Интегре” һәм “Шишеджан” эш башлады, өченчесе “Хаят Кимья” гамәлгә кую стадиясендә. Алар Россия күләмендә дә эре проектлар булып тора, дип ассызыклады ТР Президенты. Һәрберсенә кертелгән инвестицияләр күләме 200-300 млн.доллар тәшкил итә.

“Шәхсән үземнән һәм делегация исеменнән җылы мөнәсәбәттә булуыгыз өчен рәхмәт белдерәм. Министр әфәнде, без сезне Казан Сабантуена көтеп калабыз. Рәхим итегез!”, - дип мөрәҗәгать итте Рөстәм Миңнеханов Төркия тышкы эшләр министрына.