Рөстәм Миңнеханов видеоэлемтә аша "Җиңүчеләр уены"нда Татарстаннан чыгыш ясаучыларга уңышлар теләде

Бүген, Халыкара балаларны яклау көнендә, РФдә ТР Тулы вәкаләтле вәкиллегенә Татарстан балалары – бөтендөнья “Җиңүчеләр уеннары” катнашучылары килде. Алар белән Казан Кремленнән видеоконференция режимында Татарстан Республикасы Президенты Рөстәм Миңнеханов аралашты.

Шулай ук очрашуда ТРның РФдәге Тулы вәкаләтле вәкиле Равил Әхмәтшин һәм лейкемия белән авыручы балаларга ярдәм буенча Анжела Вавилова исемендәге Татарстан Иҗтимагый хәйрия фонды идарәсе рәисе Владимир Вавилов катнашты, дип хәбәр итә ТРның РФдәге Тулы вәкаләтле вәкиллеге.

“Җиңүчеләр уеннарында” онкология авыруларын кичергән балалар катнаша. Алар кичә Мәскәүдә М.Горький исемендәге Үзәк мәдәният һәм ял паркының спорт мәйданчыкларында башланды. Ярышларда Татарстан Республикасы исеменнән 7 яшьтән алып 16 яшькә кадәрге Казан, Яр Чаллы, Нурлат, Чистай һәм ТРның башка районнарыннан 8 бала катнаша.

Балалар Рөстәм Миңнехановка тренировкаларга ничек әзерләнүләре, кызыксынулары һәм киләчәккә планнары турында сөйләделәр.
Балалар үзләрен ату ярышына стендлы ату буенча күп тапкыр дөнья чемпионкасы Светлана Демина әзерләвен аеруча горурланып әйттеләр.

Президент команданы беренче җиңүе белән котлады – кичә Аделина Гербулова 60 метр дистанциягә йөгерүдә көмеш медальгә лаек булды.

“Сез кайткач, без һичшиксез сезнең белән очрашырга мөмкинлек табачакбыз һәм сезне спорт ярашларында җиңүегез белән котларбыз. Сез республика данын яклыйсыз, сез - безнең җыелма команда һәм без сезгә бик тә ышанабыз”, - диде Рөстәм Миңнеханов. Балалар ышанычны акларга сүз бирделәр.

Владимир Вавилов очрашу соңында Татарстанда мондый балаларның проблемаларына карата мөнәсәбәтне белгән “Җиңүчеләр уеннары” оештырчыларының 2014 елда чираттагы ярышларны Казанда үткәрү турындагы тәкъдимен яңгыратты.

“Без килештек, дип санагыз”, - диде Татарстан Президенты һәм ярдәмчеләргә гариза бирү өчен кирәкле документларны әзерләргә кушачагын өстәде.

ТРның РФдәге Тулы вәкаләтле вәкиле Равил Әхмәтшин 3 июньдә Тулы вәкаләтле вәкиллек тарафыннан балалар өчен бай мәдәни программа әзерләнүен сөйләде. Алар Мәскәү зоопаркында булачак, Кызыл мәйдан буйлап йөриячәкләр, Зур Кремль сарае залларында һәм башка урыннарда булачак.

Ә бүген Татарстан Президентынан балалар бүләкләр – электрон китаплар алдылар.

Бөтендөнья балалар “Җиңүчеләр уеннары” – онкология авыруларын кичергән балалар өчен дөньяда иң зур ярышлар. Аларны өченче ел рәттән Чулпан Хаматова һәм Дина Корзун нигез салган “Тормыш бүләк ит” хәйрия фонды уздыра.