Игорь Шувалов: Бүген Русия өчен Бөтендөнья сәүдә оешмасын үсеше ысуллары турында фикер алышу гаять мөһим

Азия-Тын океан регионында һәм аның партнерлары төбәкләрендә товар ташу чылбыры, ачык коридор булдыру, АТЭС һәм аның партнерлары базарларында товар алыш-бирешендә “бер тәрәзә” концепциясен кертү, азык-төлек куркынычсызлыгын 2015 елга кадәр тәэмин итү, энергияне сакчыл файдалану һәм энергиянең чиста чыганакларына игътибар бирү, авыл хуҗалыгы продукциясе җитештерүне арттыру, үстерелгән уңышны югалтуларны киметү, законсыз балык тотуга каршы көрәш алып бару, продукцияне бозылдырмый саклауга юнәлтелгән суыту һәм башка төр технологияләрне киңрәк файдалану һ.б.

Казанның Теннис академиясендә 20 майдан 5 майга кадәр уздырыла торган “Азия-Тын океан икътисади хезмәттәшлеге” - АТЭС форумы кысаларында бүген сәүдә министрлары киңәшмәсендә шулар һәм башка мәсьәләләрдә зур сөйләшү булды. Россия ягы экологик чиста продукция җитештереп җибәрүдә өлеш кертергә әзерлеге әйтелде. Киңәшмә тәнәфесендә РФ беренче вице-премьеры Игорь Шувалов, ТР Президенты Рөстәм Миңнеханов журналистлар белән очрашып, фикер уртаклашты.

2012 ел Россия өчен үтә дә әһәмиятле, чөнки Россия, АТЭС форумында ел дәвамында рәислек итүеннән тыш, Бөтендөнья сәүдә оешмасына – ВТОга әгъза булып керү мәшәкатьләрен формалаштырып бетерә, дип искәртте И.Шувалов.

Дөньякүләм сәүдә өлкәсендә вазгыять әллә ни яхшы дип булмый - Бөтендөнья сәүдә оешмасы генераль директоры Паскаль Лами да бүген киңәшмәдә шуны тануын, халыкара сәүдәдә протекционизм артуын белдерде, бу хакта И.Шувалов та искәртте.

Беренче вице-премьер, Россия исә халыкара сәүдәне үстерүгә ярдәм итүне АТЭСта рәислегенең көн кадагына алуы шуңа бәйле, диде. Россия икъдисадының куәте буларак Россия Хөкүмәте вәкиле экспортта яңа мөмкинлекләр булдыруны атады. Билгеле, моңа Азия-Тын океан регионы да керә. “Без хәзер чит илләргә чыгарыла торган товарларның яртысыннан артыгын үзебезнең традицион партнерларыбыз – Европа берлеге аша гамәлгә ашырабыз, ләкин үсеш темплары хәзерге кебек 4 процент түгел, ә 6-7 процент итәсебез килсә, бу үсеш нигезе - Азия-Тын океан төбәгендә”, - дип басым ясап әйтте И.Шувалов.

Шул хакта шәрехләп, АТЭС дәүләтләреннән ирекле сәүдә зоналары турында сөйләшүләр башлар өчен күп кенә заявка тупланды, Таможня берлеге белән Вьетнам арасында экспертлар төркеме эшли, тәкъдимнәр әле моның белән генә төгәлләнми, диде. Гомумән, Россия икътисадында, Россия, Казакъстан, Беларусьның бердәм икътисади киңлегендәге бердәм таможня территориясендә ниләр булганы кызыксындырмый кала алмый. Без исә партнерларыбыз белән Азия-Тын океан төбәгендә ачыла торган барлык мөмкинлекләрне эзлекле рәвештә һәм бик җитдиләп карап чыгарга тиеш. Шул ук вакытта ул төбәктә эшләүне гадиләрдән түгел, анда сәүдә үсеше темплары канәгатьләнерлек дип булмый, дип билгеләп үтте И.Шувалов.

Россиянең сәүдә мөнәсәбәтләре урнаштыру теләге җитди: Владивосток саммитында АТЭС ил-икътисадлары, ягъни әлеге партнерлар шуңа инанырга тиеш. Һәрхәлдә, И.Шувалов инандыру буенча зур тырышлык куела, диде. Әмма моның нәтиҗәсе контрактлар имзалану, продукция җибәртү, уртак проектлар гамәлгә ашырылу белән тәмамланырга тиеш – артка юл юк, диде ул фикерен йомгаклап.

АТЭС форумы чараларының Казанда да уздырылуы Татарстан өчен файдалы, бердән, республикага башка ил-төбәкләрне җәлеп итү булса, ә биредә әйдәп баручы илләрнең сәүдә министрлары катнаша, икенчедән, Универсиада алдыннан күп санлы кунакларны каршы алып хезмәт күрсәтергә өйрәнә тору, бөтен инфраструктураны әзерләү өчен дә кадерле - ТР Президенты Рөстәм Миңнеханов шундый фикердә. Казанны АТЭС форумы чаралары мәйданчыгы итеп сайлап алулары өчен без Россия Федерациясе Хөкүмәтенә бик рәхмәтле – килсеннәр, үз күзләре белән күрсеннәр, ди республика башлыгы.

Чыннан да, Казан – үсештәге кала. Биредә килешеп була торган партнерлар бар, теге яки бу чараның ничек узасына борчылырлык җирлек бирми торган ышанычлы партнерлар, дип мактап телгә алды РФ беренче вице-премьеры И.Шувалов Татарстан җитәкчелеген.