Рөстәм Миңнеханов Истанбулдагы икътисадый форумда чыгыш ясады

Татарстан Республикасы үсешенә бәйле күп кенә масштаблы проектларны тормышка ашыру Россия Президенты Владимир Путинның шәхси ярдәме белән генә мөмкин булды. Бу хакта кичә ТР Президенты Рөстәм Миңнеханов Истанбулда үткән Европа, Якын Көнчыгыш, Төньяк Африка һәм Үзәк Азия буенча Бөтендөнья икътисад форумында белдерде. Татарстан башлыгы форумның пленар утырышында һәм “Трансформирующаяся Россия: формирование новой архитектуры управления” секциясе эшендә катнашты.

Пленар сессиясенә кереш сүзе белән Бөтендөнья икътисад форумы президенты Клаус Шваб чыгыш ясады. Шулай ук пленар сессиядә Төркия Республикасының Премьер-министры Рәҗәп Тайип Эрдоган катнашты.

“Трансформирующаяся Россия: формирование новой архитектуры управления” секциясендә Рөстәм Миңнехановтан тыш Реконструкция һәм үсеш Европа банкы директорлары Советындагы Россия Федерациясе вәкиле Денис Морозов, “ВТБ” ААҖ идарәсе президент-рәисе Андрей Костин һәм башка экспертлар катнашты. Татарстан башлыгы секциядә чыгышы вакытында Россия Президенты итеп Владимир Путинның сайлануына бәйле үз фикерен әйтте. “Владимир Путин – бик зур тәҗрибәгә ия кеше. Һәм ул Татарстан Республикасы өчен конкрет бурычлар куя торган, аңлаешлы кеше. Шуның өчен без аның киредән кайтуын шатланып каршы алабыз”,- дип белдерде Рөстәм Миңнеханов.

“Республика динамик рәвештә үсә, безнең күп эре проектлар бар, һәм безнең башлангычлар – зур нефтехимия, нефть эшкәртү, Бөтендөнья студентлар уеннары – федераль җитәкчелек тарафыннан хупланды”, - дип ассызыклады Рөстәм Миңнеханов.

“Минем Премьер-министр булганда да, һәм республика Президенты булгач та, Владмимир Путин белән шәхси аралашуым аның үз бурычларын төгәл әйтә һәм төгәл башкара торган аңлаешлы, аңлы кеше булуын күрсәтте. Безнең илне үзгәртергә теләгән бу кеше аның көчле булуын тели, шуңа күрә без Россия Президенты сәясәтен хуплыйбыз”, - диде Татарстан башлыгы.