Рөстәм Миңнеханов: Татарстан хөкүмәте "Яңа Тура" технополисы проекты тулысынча ярдәм күрсәтә

Бүген ТР Президенты Рөстәм Миңнеханов “Яңа Тура” технополисына нигез ташы салынуга багышланган тантанада катнашты. Әлеге проект Россиядә дәүләт ярдәмендә шәхси инвестор акчаларына төзелә торган тәүге технополис. Аны гамәлгә ашыру өчен Казаннан ерак түгел генә – Яшел Үзән муниципаль берәмлеге территориясендә 250 гектарга якын мәйдан сайланган.

“Яңа Тура” проектының идеясе әлеге мәйданда заман таләпләренә җавап биргән сәүдә комплексын төзүдән гыйбарәт. Хәзер Казанда эшләүче базарларның күбесен бирегә туплау ниятләнә.

Инвесторлар технополисның беренче чираты төзелешен инде быел ук тәмамларга ниятли. Беренче чиратка кергән объектлар төзелеше 150 мең кв метрга якын мәйданда алып барылачак. Биредә потенциаль арендаторларга һәм резидентларга производство, склад, сәүдә биналарын, тулы хезмәтләр җыелмасын һәм профессиональ идарә тәкъдим итүче сәүдә-сервис технополисы калкачак.

Бу мәйданга охшаш профильдәге предприятиеләрне туплап, Россия дәүләт сәүдә-икътисад университетының Казан институты (филиалы) һәм Икътисад, идарә һәм хокук институты базасында фәнни-мәгариф үзәген төзү ниятләнә. Моннан тыш, кунакханә инфраструктурасы төзеләчәк.

Проектның инвесторлары – “Brack Capital Real Estate Russia” компаниясе белән “FGN Capital” инвестиция фонды. Алар технополисның беренче чираты төзелешенә 5 млрд сумга якын инвестицияләр салырга йөкләмә ала.

Киләчәк буыннарга хат салынган капсула белән технополисның нигез ташын салу тантанасына кадәр Президент Рөстәм Миңнеханов һәм “FGN Capital”ның Директорлар советы рәисе, технополисның идарә компаниясенең вәкаләтле вәкиле Александр Халдей “Яңа Тура” технополисы инвестиция проектын гамәлгә ашыру хакында шартнамә имзалады.

Нигез ташын салу тантанасында шулай ук ТР Премьер-министрының беренче урынбасары Равил Моратов, премьер-министр урынбасары – авыл хуҗалыгы һәм азык-төлек министры Марат Әхмәтов, мәгариф һәм фән министры Альберт Гыйльметдинов, төзелеш, архитектура һәм торак-коммуналь хуҗалык министры Ирек Фәйзуллин, Яшел Үзән муниципаль районы башлыгы Сергей Батин, югары уку йортлары һәм инвестор-компанияләр вәкилләре катнашты.

“Мондый дәрәҗәдәге объектлар Татарстанда гына түгел, Россиядә дә юк. Бу глобаль проект. Ул күп сандагы эш урыннары булдырылган нигез предприятие булачак. Иң мөһиме, биредә бизнес һәм мәгариф кооперациясенә нигез салына. Инде сентябрь аенда без беренче җибәрү комплексын кулланучыларга тәкъдим итәргә тиеш”, - дип белдерде ТР Президенты үзенең чыгышында.

“Бу безнең республикадагы беренче объект. Ул үз эчендә фән, мәгариф һәм бизнесны берләштергән зур инновацияле комплекс. Казанда һәм Яшел Үзәндә яшәүчеләр биредә якынча 20-40 мең яңа эш урыны табачак. Фәнни-мәгариф кластеры биредә студентлар тормышының яңа учагын табачак. Агросәнәгать комплексы өчен биредә яңа логистика складлары барлыкка киләчәк”, - ди FGN Capital”ның Директорлар советы рәисе Александр Халдей.

Ул Татарстанда бизнеска булган мөнәсәбәтнең, дәүләт-бизнес мөнәсәбәтләре форматының үсешкә уңай йогынты ясавын ассызыклап үтте.