Илдар Халиков III Россия-Европа инновацион форумының пленар сессиясендә чыгыш ясады

Безгә инновацион инфраструктураны үстерү, производствога инновацияләр кертү буенча Евросоюз тәҗрибәсен өйрәнү кызыклы. Бу хакта бүген III Россия-Ауропа инновацион форумы пленар утырышында Татарстан Премьер-министры Илдар Халиков чарада катнашучыларга сәламләү сүзе белән мөрәҗәгать итеп белдерде.

Искәртеп узабыз, Татарстан Республикасы Хөкүмәт башлыгы Финляндия Республикасында эш сәфәре кысаларында III Россия-Ауропа инновацион форумында һәм XXI Ауропа бизнес-инновацион үзәкләре челтәре конгрессында катнаша.

Чара Лаппеенранта шәһәре технология университеты базасында уза.

Илдар Халиков чарада катнашучыларны III Россия-Ауропа инновацион форумы эше башлану белән котлады һәм Татарстан Республикасы экспозициясе белән танышырга чакырды. Аның сүзләренә караганда, Татарстан делегациясе составына вузлар, сәнәгать предприятиеләр белгечләре, инновацион мәйданчыклар – технопарклар, технополислар топ-менеджерлары, шулай ук республиканың хөкүмәт структурасы җитәкчеләре кергән.

Бүген Россия – чыннан да Мәскәү һәм Санкт-Петербург кына түгел, аның төбәкләре дә, диде Илдар Халиков. Татарстан тотрыклы һәм динамик рәвештә үсеш алучы федерация субъектларының берсе. 2011 елда Татарстан “Форбс” журналы версиясе буенча бизнес һәм инвестицияләр үстерү өчен Росиянең иң яхшы төбәкләренең берсе булып танылды.

Татарстан Премьер-министры республиканың 2011 елда ирешкән икътисади нәтиҗәләре, шулай ук якын арада гамәлгә куелачак перспективалы проектлары турында кыскача сөйләде. 2012 елның май-июнь айларында Азия-Тын океан икътисади хезмәттәшлеге форумы (АТЭС) кысаларында министрлык киңәшмәсе уңышлы узды, 2013 елның июлендә Казан Җәйге универсиаданы кабул итә, 2015 елда – спортның су төрләре буенча дөнья чемпионатын, ә 2018 елда – футбол буенча дөнья чемпионаты матчларын дип искәртте ул.

Инновацион инфраструктура объектлары челтәрен формалаштыру һәм үстерүгә килгәндә, бүген республикада хакимият тарафыннан бу мәсьәләгә җитди игътибар бирелә дип билгеләп үтте Илдар Халиков. 2009 елда Казанда Көнчыгыш Ауропада иң эре IT-паркларның берсе ачылды. Бүгенге көндә анда 64 компания урнашкан, аларның 25е IT өлкәсендә эшчәнлек алып бара, 5 - сервис өлкәсендә, 31 компания бизнес-инкубатор резиденты булып тора. Гомумән алганда, IT-парк 1,5 мең эш урыны белән тәэмин итте.

Илдар Халиков чираттагы “Химград” технополисын да тәкъдим итте, бүген анда 170 компания-резидент урнашкан.

Илдар Халиков кече һәм урта бизнесның эре сәнәгать предприятиесе белән уңышлы эш алып баручы проекты буларак “Мастер” Кама индустриаль паркын атады. Проект 2004 елда “КАМАЗ” ААҖнең бушаткан мәйданчыкларында булдырылган һәм бүген анда 190 компания-резидент эшли. “Мастер” КИП автокомпонентлар чыгарып “КАМАЗ” автогигантына ярдәм күрсәтә, дип билгеләп үтте Татарстан Премьер-министры.

Республикада гамәлгә куелган соңгы проектларның берсе – инновацион шәһәр “Иннополис-Казань” спутнигы. 9 июньдә Россия Хөкүмәт Рәисе Дмитрий Медведев Татарстан башкаласына визит кысаларында бу проект нигезенә таш салды.

Безнең өчен Ауропа бизнес-инновацион үзәкләре челтәре тәҗрибәсен өйрәнү мөһим, андый инновацион мәйданчыкларның нинди өстенлекләр бирүен тану кирәк, диде Татарстан Премьер-министры. Ул чарада катнашучыларны Татастан Республикасына инновацион мәйданчыклар һәм республика инфраструктурасы белән танышырга чакырды.